Astanalyqtardyń basym bóligi sol jaǵalaýda turǵysy keledi - Zertteý nátıjesi
Bul týraly búgin Astanada ótken baspasóz máslıhatynda «Menedjment Jyljymaıtyn múlik qory» jaýapkershiligi shekteýli seriktestiginiń dırektory Aısultan Akchýrın málim etti. Toqtala ketetin jaıt, «Menedjment Jyljymaıtyn múlik qory» JShS elimizdegi jalǵa beriletin turǵyn úılerdi basqarýdaǵy biregeı tájirıbege ıe kompanııa bolyp tabylady. Qurylys salasyndaǵy jańa baǵdarlama boıynsha elimizde aldaǵy ýaqytta mıllıondaǵan sharshy metr baspana beriletinin eskersek, turǵyn úı qoryn saqtap qana qoımaı, onyń uzaq merzimdegi tartymdylyǵyn arttyrý da mańyzdy bolmaq. Dál osy problemalardy anyq aıqyndaý maqsatynda atalǵan JShS tarapynan zertteý jasalǵan.
«Saýalnamaǵa qatysqandardyń 87 paıyzy ózderiniń turǵyn úılerin úlkeıtkisi keletinin kórsetti. Sondyqtan da, atalǵan kórsetkish ózderiniń baspanasyn úlkeıtý úshin búgingideı sharttarmen tólemder jasasýǵa kelisetindikterin bildirdi», - deıdi «Menedjment Jyljymaıtyn múlik qory» JShS dırektory Aısultan Akchýrın.
Sonymen qosa, saýal jasalǵandardyń basym bóligi turǵyn úılerdiń sapasyna basa nazar aýdarý qajettigin aıtqan. 44 paıyzy páterleriniń aýdany 125 sharshy metrden joǵary bolsa dep kórsetse, 27 paıyzy 90 -125 sharshy metr, al 35 paıyzy 50-90 sharshy metrge deıin dep belgiledi.
«Negizinen saýalnama Astana qalasynda júrgizilgen bolatyn. Osyǵan oraı, suralǵandardyń 77 paıyzy Esildiń sol jaǵalaýynda turǵysy keletinin bildirdi. Sondaı-aq olardyń 56 paıyzy qurylys materıaldarynyń ekologııalyq turǵydan sapaly bolýy tıistigin atap ótken», - dedi A. Akchýrın.
Esterińizge sala keteıik, atalǵan JShS «Samuryq-Qazyna» Jyljymaıtyn múlik qory» AQ-nyń enshiles uıymy bolyp tabylady jáne onyń basty qyzmeti - turǵyn úı men kommertsııalyq ǵımarattardy jalǵa berý, jalǵa beriletin baspanalar qoryn basqarý.
