Astanalyqtardyń 90 paıyzy trotýardyń nasharlyǵyna shaǵymdandy - «Jańa adamdar»

ASTANA. QazAqparat – «Jańa adamdar» jastar qozǵalysy Astanadaǵy qaýipti ýchaskelerdiń tizimin ázirlep jatyr. Belsendiler bul iske kez kelgen turǵyn atsalysa alatynyn aıtady, dep habarlaıdy QazAqparat tilshisi.

Prezıdent Qasym-Jomart Toqaevtyń qalalar men Astanany abattandyrý týraly tapsyrmasyn negiz etip alǵan «Jańa adamdar» jastar qozǵalysynyń belsendileri elorda turǵyndary arasynda saýalnama júrgizdi.

«Qalańyzda qandaı problema bar?» degen saýalǵa jaýap bergenderdiń 90% jaıaý júrginshilerge arnalǵan trotýardyń joqtyǵyn aıtqan.

Bul másele ásirese mektep jasyndaǵy balalardyń arqasyna batatyn kórinedi.

Qalanyń ortalyq bólikterinde jaıaý júrginshige arnalǵan soqpaqtyń bolmaýy olar úshin aıtarlyqtaı kedergi.

Jas analar sábı salǵan arbamen qalada qydyrý qıyn ekenin aıtqan. Onyń da sebebi – trotýardyń joqtyǵy.

Osy shaǵymdardan keıin qozǵalys belsendileri qaladaǵy trotýarlarǵa test-draıv ótkizip kórgen.

«Bir kúnniń ózinde ǵana 35-ten astam jaısyz nemes apattyq jaǵdaıdaǵy ýchaskeni anyqtadyq. Mundaı aqaýly tustar budan da kóp ekenine senimdimin. Oolardy osykúıi qaldyrýǵa bolmaıdy. «Jańa Qazaqstannyń astanasynda mundaı qaýipti joldar bolmaýy kerek», - deıdi «Jańa adamdar belsendisi Arlen Tańatuly.

Qozǵalys ókilderi qala turǵyndaryn Astanadaǵy problemaly oryndardyń tizimin birlesip ázirleýge shaqyryp otyr.

«Turǵyndar qalanyń qaı bóliginde qaýipti oryndar ekenin bizge joldaı alady. Biz sonyń bárin jınastyryp, 11 mamyr kúni ákimdikke aparamyz», - deıdi «Jańa adamdar» ókili.