Astanalyqtardyń 64 mln teńgesi jelge ushty
ASTANA. QazAqparat - Astanalyqtar qarapaıym órt qaýipsizdigi erejelerin saqtamaýynan jyl saıyn qyrýar shyǵynǵa batyp jatady. Ondaı oqıǵalardyń basym bóligi jeke turǵyn úılerde, sonyń ishinde «vremıankalar» men saıajaılarda jıi bolady, dep habarlaıdy QazAqparat tilshisi.
Resmı málimetke sáıkes, sońǵy on aıdyń ishinde Astanada 564 órt oqıǵasy tirkeldi. Qaza bolǵan 6 adamnyń úsheýi - bala. Budan bólek, júzdegen adam jaraqat aldy. Al órt oqıǵalarynan kelgen materıaldyq shyǵyn 64 mln 387 myń teńgeni qurady. Jylý maýsymy kezinde órt oqıǵalary jıi bolady. Sebebi adamdar kómir jaǵyp, san alýan jylytý quraldaryn qoldanady. Osyǵan baılanysty astanalyq órt sóndirýshiler men qutqarýshylar qarapaıym qaýipsizdik erejelerin saqtaýǵa keńes berip otyr.
«Iá, jylytý maýsymy kezinde jeke sektorda órt oqıǵalary kúnnen kúnge kóbeıip keledi. Sebebi peshterdi durys jaqpaıdy, murjalar men peshtiń qudyqtaryn ýaqytynda tazalamaıdy. Sosyn Astananyń halqy ósip jatyr, turǵyn úıler de artyp keledi. Saıajaılarda turatyn adamdar da az emes. Negizi, ondaı jerlerde tek jazǵy ýaqytta ǵana turady. Ondaǵy qurylys nysandary da sol mezgilge eseptelgen. Adamdar bolsa, peshterdi ornatyp, talapqa kelmeıtin qurylǵylardy jıi paıdalanady. Sonyń saldarynan órt oqıǵalary da bolady», - deıdi Astananyń órt qaýipsizdigi salasyndaǵy baqylaý jáne profılaktıkalyq qyzmet basqarmasynyń ókili, azamattyq qorǵaý kapıtany Murat Madybekov.
