Astanalyqtardy qandaı problemalar mazalaıdy
NUR-SULTAN. QazAqparat - Búginde iKomek ortalyǵynyń operatorlary kún saıyn myńdaǵan aryz-shaǵymdy qabyldaıdy. Sonyń negizinde halyqty jıi mazalaıtyn máselelerdi reıtıngi jasaldy, dep habarlaıdy QazAqparat tilshisi.
Elordanyń qalalyq monıtorıng jáne jedel áreket etý ortalyǵynyń basshysy Jannat Dýbırovanyń aıtýynsha, búginde ortaq júıege barlyq kommýnaldyq qyzmetter qosylǵan. Sonyń arqasynda operatorlar aryz-shaǵymdardy óńdep, shuǵyl tıisti mekemege joldap otyrady.
QazAqparat tilshisine suhbat bergen ortalyq basshysy óziniń uıaly telefony arqyly júıege kirip, astanalyqtardy jıi mazalaıtyn problemalardy da kórsetip berdi.
«Máselen, júıeli problemalar reıtıngin ashyp qaraıtyn bolsaq, birinshi orynda qudyqtar máselesi tur. Sonyń ishinde qudyq qaqpaqtary jáne taǵy basqa problemalar bar. Ekinshi orynda - gazben qamtamasyz etý. Halyq gazgolderlerge ýaqytynda gaz quımaıdy dep aryzdanady. Úshinshi orynda - qoǵamdyq kólik. Sonyń ishinde qyzmet sapasy, avtobýstardyń keshigýi jáne taǵy basqa máseleler bar. Tórtinshi orynda - sý basý máselesi. Al besinshi orynda - lıftter qyzmeti. Sosyn káriz, PIK-ter, densaýlyqty saqtaý dep kete beredi», - dedi J.Dýbırova. Ázirshe, atalǵan júıege tek ákimdik qyzmetkerleri ǵana kire alady. Aldaǵy ýaqytta ashyq portaldy iske qosý josparlanyp otyr. Sol kezde halyq atalǵan portalǵa kirip, barlyq aqparatty kóre alady.
Onyń sózine qaraǵanda, ótken jyly iKomek-ke 1 mıllıon aryz-shaǵym túsken. Al bıyl jyl basynan beri 500 myń ótinish qabyldandy. «Máselen, naýryz aıynda 30 000 myń adam habarlasty. Qazirgi kezde 6 myń aryz-shaǵymdy oryndap jatyr. Kún saıyn biz 12 myń qońyraýdy qabyldap otyramyz. Negizi, bir mıllıon halqy bar qala úshin bul - óte úlken kórsetkish», - dep atap kórsetti J.Dýbırova.
Aıta keteıik, iKomek júıesinde jaýapsyz PIK-terdiń tizimi de bar. Aldaǵy ýaqytta atalǵan aqparattyń bári ashyq jarııalanady. iKomek ortalyǵynyń operatorlary aryz-shaǵymdardy barlyq baılanys arnalary arqyly qabyldaıdy. Sonyń ishinde www.astana.gov.kz saıty, WhatsApp nómiri: +77471090109, Telegram chat-boty: iKOMEK 109 mobıldi qosymshasy (PlayMarket nemese Apple store ), «Smart Astana» mobıldi qosymshasy (PlayMarket | AppStore), 109@ikomekastana.kz elektrondyq mekenjaıy, sondaı-aq, 109 tegin qońyraý shalý nómiri bar.
