Astanalyqtardy densaýlyq saqtaý, abattandyrý jáne avtobýs máselesi jıi alańdatady
Nur-Sultan qalalyq monıtorıng jáne jedel áreket etý ortalyǵy bergen málimetke súıensek, bıyl iKOMEK-109 ortalyǵyna 661 myńnan astam ótinish túsken.
Elorda turǵyndaryn negizinen densaýlyq saqtaý, qoǵamdyq kólik, abattandyrý jáne taǵy basqa máseleler alańdatady.
«Monıtorıng jáne jedel áreket etý ortalyǵy qaladaǵy qaýipsiz ári taza tirshilik úshin baqylaý júrgizedi. Onyń ishinde kommýnaldyq qyzmetter de bar. Búginde qala ishi men turǵyn úı alaptary aýmaǵyndaǵy qar ýaqytyly tazalanyp, shyǵarylyp jatyr», - dedi iKOMEK109 qalalyq ortalyǵynyń basshysy Jannat Dúbirova.
Ortalyqtyń habarlaýynsha, beınebaqylaý kameralary arqyly joldar men turǵyn úı aýlalaryn sý shaıý anyqtalǵan jaǵdaıda, oqıǵa ornyna jedel sý sorǵysh tehnıkasy jiberiledi.
«Beınebaqylaý ınspektorlary táýlik boıy 16 myńnan astam beınebaqylaý kamerasynyń kómegimen qala turǵyndarynyń qaýipsiz ári jaıly ómir súrýi úshin monıtorıng júrgizedi. Beınebaqylaý júıesi qar jınaý, sý basý, qoqys úıilý derekterin tirkeıdi. Sondaı-aq, qaladaǵy quqyqtyq tártip polıtsııa departamentiniń qyzmetkerlerimen birlesip uıymdastyrylady», - deıdi vedomstvodan.
Eske sala ketsek, iKOMEK109 biryńǵaı baılanys ortalyǵyna kez kelgen turǵyn júgine alady.
Astanalyqtar ózderin tolǵandyrǵan máseleni tómendegi ádisterdiń birin tańdap, ortalyqqa jetkize alady.
- 109 nómirine qońyraý shalý (qalalyq jáne mobıldi telefondar úshin tegin)
- qala ákimdiginiń resmı saıty
- Telegram chat-boty
- iKOMEK109 mobıldi qosymshasy (PlayMarket/AppStore);
- Smart Astana mobıldi qosymshasy (PlayMarket/AppStore);
- Facebook, Instagram áleýmettik jelilerinde @ikomek109-dy belgileý;
- 109@ikomekastana.kz elektrondy poshtasy.
