Astanalyqtar jas ártister qoıǵan «Don Jýan» operasyn tamashalady
Uıymdastyrýshylardyń aıtýynsha, atalǵan premerany sahnalaýdyń ereksheligi sol barlyq rólderdi «Astana Opera» teatry janyndaǵy halyqaralyq opera akademııasynyń jas tyńdaýshylary oryndaıdy. ıAǵnı, jas ártisterdiń deni úlken sahnaǵa alǵash shyǵyp otyr.
Spektakldiń dırıjerleri ıtalıandyq maestro, «Astana Opera» teatrynyń art-menedjeri Djýzeppe Akýavıva men Rýslan Baımýrzın. Qoıýshy rejısser Alla Sımonıshvılı jáne bas hormeıster Erjan Dáýitov.
«Motsart óz shyǵarmalarynda birneshe estetıkalyq kezeńdi qamtydy. Jetilgen barokkodan bastap, klassıtsızmnen ótip, estetıkanyń romantıkalyq kezeńine deıin jetti. «Don Jýan» Motsarttyń danyshpan aqyn Lorentso da Ponte birlesip jazǵan operalardyń biri. Ol Batys ádebıetinde kóńildi tilde aıtylatyn drama retinde anyqtalǵan. Atalǵan týyndy mańyzdy degen dúnıelerdi kúlkili etip jetkizedi deýge bolady», – deıdi qoıýshy rejısser Alla Sımonıshvılı BAQ ókilderiniń suraǵyna jaýap bere turyp.
Sondaı-aq qoıýshy rejısser daıyndyq barysynda qandaı kedergilerdiń kezdeskenin aıtty.
«Daıyndyq kezinde qıyndyqtar týyndady. Sahnalyq tájirıbesi joq adamǵa kóńil-kúı, qozǵalys pen operany oryndaýdy biriktirý qıynǵa soǵady. Sebebi úılestirý jaǵy kúrdeli. Ánshi operany oryndaýmen qatar, róldi somdaıdy. Onyń ústine «Don Jýan» operasy odan ári qalaı órbıdi degen jaıttar men emotsııaǵa toly shyǵarma. Bir orynda turyp án aıtýǵa daǵdylanǵan oryndaýshy úshin qımyl qozǵalysty qatar alyp júrý ońaı emes. Bul baǵytta ártister biraz jumys istedi», - deıdi ol.
«Don Jýan» operasyndaǵy basty partııany «Astana Opera» opera jáne balet teatrynyń solısi Rasýl Jalmaǵanbetov oryndady.
«Motsart jazǵan partııany alǵash ret oryndaımyn. Qandaı ról bolmasyn kez-kelgen partııaǵa baıyppen qaraımyz. Sondyqtan shynaıy beıneleý men mýzykalyq turǵyda qıyndyqtar bar. Motsart - meniń súıikti kompozıtorlarymnyń biri. Rólge úırenýge qoıýshy rejısser Alla Sımonıshvılı kómektesti. Ol kisi óte saýatty ári sezimtal. Qoıýshy rejısser «Seniń rólińdegi «Don Jýan» basqa oryndaýshylardan ózgeshe bolýy kerek», - dedi. Men oryndaıtyn «Don Jýan» óz daralyǵymen erekshelenedi dep oılaımyn», - deıdi Rasýl Jalmaǵanbetov.