Astanalyqtar úshin elektr energııasynyń quny arzandady
ASTANA. QazAqparat - Astanada ústimizdegi jyldyń 7 naýryzynan bastap elektr energııasymen jabdyqtaý qyzmetteriniń baǵasy arzandady, dep habarlaıdy elorda ákimdiginiń baspasóz qyzmetinen.
Qazaqstan Respýblıkasy Energetıka mınıstrliginiń 2015 jylǵy 20 aqpandaǵy N12-05/5394 hatyna sáıkes, 2015 jylǵy 1 aqpannan bastap "Bolat Nurjanov atyndaǵy Ekibastuz GRES-1"-inde elektr energııasy baǵasynyń 8,65 teńge kVt/saǵatqa deıin tómendegenin habarlady. Buryn elektr energııasynyń quny 8,80 teńge kVt/saǵatty quraǵan bolatyn. Osyǵan baılanysty, Qazaqstan Respýblıkasy Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetiniń Astana qalasy boıynsha departamentiniń baǵa saraptamasynyń nátıjesi boıynsha 7 naýryzdan bastap "Astanaenergosbyt" JShS elektr energııasymen qamtý qyzmetteriniń baǵasyn arzandatty. Osylaısha, elektr energııasynyń ortasha taratý tarıfi QQS qosa alǵanda, 1 kVt/ saǵat úshin 13,80 teńgeni qurady. Bul buǵan deıingi tarıfke qaraǵanda 6 tıynǵa, ıaǵnı 0,43%-ǵa arzan. Bul rette elektr energııasynyń ortasha taratý baǵasy turǵyndar úshin orta eseppen 13 tıynǵa, ıaǵnı, 0,97%-ǵa tómendese, basqa tutynýshylar úshin orta eseppen 5 tıynǵa, ıaǵnı 0,26%-ǵa arzandady.
