Astanalyqtar uly sýretshi Van Gog kartınalarynyń kóshirmelerin tamashalaı alady
ASTANA. 7 maýsym. QazAqparat - Astanalyqtar uly sýretshi Vınsent Van Gogtyń shyǵarmashylyǵymen tanysý múmkindigine ıe bolmaq.
10 maýsym kúni Nazarbaev Ortalyǵynda álemge áıgili gollandyq sýretshi-postımpressıonıst kartınalarynyń kóshirmeleri qoıylǵan kórmeniń ashylýy ótedi, dep habarlandy Astana qalasynyń resmı saıtynda.
Atalǵan is-sharany Astanadaǵy Gollandııa kúnine oraı Nazarbaev Ortalyǵy men Nıderlandııa Elshiligi uıymdastyryp otyr. Kórmege 44 peızaj jáne avtoportret kóshirmeleri qoıylmaqshy.
Vınsent Van Gog golland keskindemeshisi, ımpressıonızmnen keıingi kezeńniń eń kórnekti ókilderiniń biri. 1869-76 jyldary Gaaga, Brıýssel, London, Parıj kórkem sýret týyndylaryn satý fırmasynda deldaldyq jumystar atqarǵan. 30 jasynan bastap sýret salýmen aınalysyp, negizinen, qarapaıym jandardyń ómirin beınelegen túrli kórinister men serııaly kartınalar jazdy. Vınsent Van Gog tarıhtaǵy tanymal ári uly sýretshilerdiń biri. Pablo Pıkassonyń tańǵajaıyp týyndylarymen qatar Van Gogtyń shyǵarmashylyǵy da baǵaly kartınalar tiziminiń alǵashqy qatarynda.
Búgingi kúnge deıin ataqty sýretshiniń 1700 jumysy saqtalǵandyǵyn atap ótken jón. Olardyń 900-ge jýyǵy sýret jáne 800-den astamy keskindeme. Sonymen qatar, Van Gog 40-qa jýyq avtoportrettiń avtory. Kórmeniń ashylýy 10 maýsym kúni saǵat 18.30-da Nazarbaev rtalyǵynda ótedi. Kórme bir kúnge sozylmaq.
