Astanalyqtar ÚIIDB jaıynda ne biledi?!
Munda aýyl sharýashylyǵy tehnıkalary, áýe jáne avtomobıl kólikteri qoıylǵan. Ashyq aspan astynda ótkizilip otyrǵan kórmeniń basty ereksheligi - ekspozıtsııadaǵy barlyq ónim Qazaqstanda jasalǵan. Ónim spektri óte aýqymdy. Munda «Agromash holdıng» shyǵarǵan kombaındar, Ssang Yong djıp kólikteri, «Aqtóberentgen» AQ-nyń «MedKar-Ý» jyljymaly kesheni, Hundai jáne KIA avtomobılderi, KamAZ júk kólikteri men Belarýs traktorlary qoıylǵan.
Osyǵan oraı «QazAqparat» agenttiginiń tilshileri elorda turǵyndarynan Údemeli ındýstrııalyq-ınnovatsııalyq damý memlekettik baǵdarlamasy jaıynda ne biletindikterin surap kórgen bolatyn.
Kásipker Máıken Smaǵulov: «Prezıdent el aldynda úlken maqsattar qoıdy. Qazirgi ýaqytta bizdiń memlekette óndiris qarqyn ala bastady. Zaýyttar salynýda, Úkimet qyrýar qarjy bólip jatyr. Meniń oıymsha, memlekettik ındýstrııalandyrý baǵdarlamasy ózin aqtaıdy, biz aýqatty ómir keshýge tıispiz».
Júrgizýshi Qýandyq Seıitjanov: «Qazaqstan óziniń damýyn qarqyndata túsken, bul adamdardyń ál-aýqatynyń joǵarylaýynan-aq sezinýge bolady. Biz baqýatty ómir súre bastadyq. Myna kórmege qarańyzshy, men shyny kerek Qazaqstannyń avtomobıl, ushaq, avtobýs qurastyratyndyǵyn birinshi ret kórip otyrmyn. Koreılik Kıa, Sang Iong, Hýndaı kólikteri tipti keremet! Baǵalary japon, nemis kólikterinen arzan, biraq sapasy olardan kem emes».
Memlekettik qyzmetshi Janel Úmbetálıeva: «Qazaqstannyń Údemeli ındýstrııalyq-ınnovatsııalyq damý memlekettik baǵdarlamasy bizge qajet ýaqytta, memleket jetkilikti resýrs pen áleýet jınaǵan tusta der kezinde bastaldy. Men ár kezde de Prezıdentti qoldap kelemin. Ol kóregen jáne sarabdal saıasatker. Biz árdaıym sizben bolamyz, Nursultan Ábishuly».
