Astanalyqtar ýchaskelik polıtsııaǵa chat arqyly shaǵymdana alady
NUR-SULTAN. QazAqparat – Elordanyń ýchaskelik polıtseıleri turǵyndarmen chat arqyly baılanys ornatyp jatyr, dep habarlaıdy QazAqparat tilshisi.
Bul týray Nur-Sultan qalasy poltsııa departamentiniń baspasóz qyzmeti málim etti.
«Ashyqtyq, aıqyndyq, azamattardyń ótinishterine jedel den qoıý, halyqpen keri baılanys ornatý, quqyq buzýshylyqtyń aldyn alý – astanalyq ýchaskelik ınspektorlardyń jumysyndaǵy basty basymdyqtar. Qalada qoǵamdyq qaýipsizdik pen quqyqtyq tártipti qamtamasyz etý, abattandyrý erejelerin saqtaý isinde ýchaskelik, páter ıeleri kooperatıvteriniń jáne turǵyndardyń birlesken chattary jaqsy kómekshi qural bolyp otyr. Kún saıyn ýchaskelik polıtsııa ınspektorlary turǵyndar chattaryna profılaktıkalyq aqparat jarııalap oytrady. Qala turǵyndarynyń problemalary, tzań buzý týraly shaǵymdar osy chattarda qaralady. Qysqa merzim ishinde turǵyndar arasyndaǵy ózara árekettesýdiń bul ádisi óz nátıjelerin kórsetti», - dep jazady departamenttiń baspasóz qyzmeti.
Departament ókilderiniń aıtýynsha, ýchaskelik ınspektor chattardan azamattardyń problemalary týraly aqparatty alyp, qoǵamdyq oryndarda ishimdik ishý, belgilenbegen oryndarda temeki shegý, tynyshtyqty buzý, usaq buzaqylyq sııaqty zań buzýshylyqtardy der kezinde toqtatýǵa múmkindik alyp otyr.
«Bizdiń aǵa ýchaskelik polıtseı, Ótegen Tastanquldyń arqasynda úıimizde tazalyq pen tártip ornady. Ol barlyq máselelerge der kezinde jaýap beredi, páterlerdi aralap, turǵyndardyń shaǵymdary men eskertýlerine qulaq asa biledi. Chatta ýchaskelik ınspektordyń bolýy jáne onyń zańsyzdyqtarǵa tez áreket etýi turǵyndardy da tártipke keltiredi eken. Bizdiń kireberiste qoqys ta, temeki de bolmaıdy», - deıdi «Jeleznodorojnyı» turǵyn alabynyń turǵyny.
