Astanalyqtar tańdaýly klınıkada 3 myń eýronyń qyzmetin tegin paıdalanýǵa múmkindik aldy
ASTANA. 19 sáýir. QazAqparat - Búgin Astanada Respýblıkalyq dıagnostıkalyq ortalyqta «Tekserýden ót - aýrýdyń aldyn al» atty qaıyrymdylyq aktsııasy bastaldy.
Eki kúnge jalǵasatyn shara barysynda halyqtyń áleýmettik álsiz toptary, múgedekter, kóp balaly analar men ortalyq qyzmetkerleri tegin dıagnostıkalyq tekserýden ótedi.
Ortalyqtyń basqarma tóraǵasy Ámir Ahetovtiń aıtýynsha, aqyly túrde tolyq medıtsınalyq dıagnostıkalyq tekserýden ótýge shamamen 2-3 myń eýro kóleminde aqsha qajet. Al Germanııanyń klınıkalarynda mundaı qyzmet túri tipti 20 myń eýrodan asyp jyǵylady eken.
Bul sharany «Ulttyq medıtsınalyq holdıng» AQ janyndaǵy «Nur Otan» HDP fılıaly uıymdastyryp otyr. Fılıal tóraǵasynyń birinshi orynbasaryMárııa Ótebaevanyń aıtýynsha, Ulttyq medıtsınalyq holdıng osy tárizdi ıgilikti isti jyl saıyn ótkizýdi dástúrge aınaldyrǵan.
«Jyl saıyn medıtsınalyq ortalyqtarda 4-5 qaıyrymdylyq sharasy uıymdastyrylyp turady. Jeńis kúnine oraı, Holdıng 7 mamyr kúni elordadaǵy ardagerlerge arnap arnaıy shara jasaýdy josparlaýda», deıdi M. Ótebaeva.
«RDO» AQ - QR Prezıdentiniń tapsyrmasy boıynsha qurylǵan medıtsınalyq klaster nysandarynyń biri.
«Respýblıkalyq dıagnostıkalyq ortalyq» aktsıonerlik qoǵamy qazirgi zaman talaptaryna jaýap beretin kompıýterlik apparattarmen jabdyqtalǵan. Munda onkologııalyq, júrek-qan tamyrlary, júıke aýrýlaryn molekýlalyq deńgeıde erte bastan radıoızotoptyq dıagnostıkalaýdy júzege asyratyn ıadrolyq tomografııa jumys isteýde. Mundaı joǵary tehnıkalyq qondyrǵynyń Qazaqstanda ǵana emes, búkil Ortalyq Azııada balamasy joq. Onyń ereksheligi sol, ıadrolyq medıtsına qýatyn tıimdi paıdalana otyryp, adam músheleri men tinindegi kózge kórinbeıtin kletkalardaǵy kinárattardy molekýlalyq deńgeıde esh qatesiz anyqtaıdy.
Sonymen birge, dıagnostıkalyq ortalyq quramynda tereń ǵylymı-zertteý jumystaryn júrgizetin aýqymdy zerthanalyq qyzmet salasy bar. Bularda klınıkalyq mıkrobıologııa jáne parazıtologııa ádisteri boıynsha, jalpy klınıkalyq jáne gematologııalyq ádister boıynsha, bıohımııalyq jáne ımmýndy-fermenttik ádister boıynsha zertteý júrgizetin bólimsheleri jáne basqa ozyq tehnologııalardy ǵylymmen berik ushtastyra otyryp, zertteýler júrgizetin ortalyqtar jumys isteıdi.
