Astanalyqtar shahandyqtarǵa kómek jóneltti

ASTANA. QazAqparat - Elordalyqtar Shaxandaǵy apattan zardap shekkenderge kıim-keshek jáne buzylmaıtyn azyq-túlik jınap, búgin jóneltti. Bul jaıynda belgili aqyn ári jýrnalıst, QR Qorǵanys jáne aeroǵarysh mınıstriniń baspasóz xatshysy Aqberen Elgezek óziniń Feısbýktaǵy paraqshasynda jazdy, dep habarlaıdy QazAqparat.

«#shahankómek sharasy osymen támam. Astanada uıymdastyrylǵan bul sharada elordalyqtar asa joǵary belsendilik tanytty. Erlan Saırov aǵamyzben alǵash aqyldasyp, sharýany bastaǵanda mundaı bolady dep kútpegen edik. Jasyrmaımyz, ary ketse, 20-30 adam keler dep úmittengenbiz. Biraq, óz otandasyna degen janashyrlyq, eldiń birligi óte joǵary deńgeıde eken. Soǵan kózimiz jetip, qýandyq. Astanadan bólek, eldiń túkpir-túkpirinen kómek qolyn sozǵysy kelgen aǵaıynda esep joq. Telefonymyz tynym tappady. Habarlasyp jatqandar óte kóp, birine jaýap berseń, ekinshisi jelide kútip turdy. Vatsap, messendjer degen sııaqty qosymshalar hatqa tolyp qaldy. Munyń barlyǵy bizdiń qoǵamnyń sanasynyń óskendigin, bir-birine degen baýyrmaldyq, aǵaıyndyq súıispenshilik pen qurmettiń joǵalmaǵandyǵyn kórsetedi. Qazaq halqy qaı zamanda da óz jaqynyn dalaǵa qaldyrmaǵan, qıyn jaǵdaıda qolushyn bergen, nanyn bólisip jegen. Kim ne dese de, bul qasıet bizdiń boıymyzda saqtalǵan eken! Táýba!», - dep jazdy ol.

Sondaı-aq Aqberen Elgezek sharany bastaǵan sátte keıbireýlerdiń oǵan synı kózben qaraǵandyǵyn da atap ótken.

«Qosh, sonymen aq pen qara aralasqan bul ómirde bári bolady. Shahandaǵy bolǵan jaǵdaı kúlli qazaqtyń qabyrǵasyn qaıystyrdy. Aramyzdan ajal alyp ketken marqumdarǵa duǵa tilep, tirige tireýge ıyǵymyzdy usyndyq. Artyq-kem ketken jerimiz bolsa, ǵafý qylarsyzdar. Jyly kıim, azyq-túlik mol jınaldy. Búgin osy halyqtyń qolymen jınalǵan dúnıe Shahandaǵy zardap shekken aǵaıynǵa jóneltiledi. Barshańyzǵa kóp rahmet aıtamyz! Alla isterińizge bereke bersin! Elimizde endi mundaı jaǵdaı eshqashan qaıtalanbasyn! Aman-esen bolaıyq, bolashaǵymyz jarqyn bolǵaı!», - dep jazdy Elgezek.