Astanalyqtar Pavlodardyń etin satyp alý úshin jármeńkege aǵylýda
ASTANA. QazAqparat - Astanada Pavlodar oblysynyń aýylsharýashylyq ónimderiniń jármeńkesi ótip jatyr, dep habarlaıdy QazAqparat tilshisi.
Aýyl sharýashylyǵy jármeńkesine oblystyń barlyq óńirlerinen 100-den astam kásiporyn qatysýda. Pavlodar oblysynan barlyǵy 110 mln teńge somasyna 465 tonna kóleminde ónim jetkizildi.
Onyń ishinde 36,7 tonna et (barlyq túri), 220 tonna kartop, 80 tonna kókónis, 60 tonna baqsha daqyldary, 5 tonna balyq, 90 myń dana jumyrtqa, 6 tonna shujyq ónimderi, 1500 dana et konservileri, 10 tonna sút ónimderi, 7,5 tonna qymyz, 4 tonna irimshik, 10 tonna un, 6 tonna jarma, 2 tonna makaron, 2 tonna nan-toqash jáne kondıterlik ónimder, 4,5 tonna bal, 4 tonna ósimdik maıy ákelindi.
«Pavlodarlyq kásiporyndar aýylsharýashylyq, azyq-túlik ónimderiniń keńeıtilgen assortımentin ákeldi. Sonymen qatar taýardy satyp alýshylarǵa ekologııalyq taza paketter usynylýda. Jármekege 50 myńnan astam adam keledi dep josparlaýdamyz. Elordalyqtar kóbinese Baıanaýyl eti men kartop ónimine qyzyǵýshylyq tanytýda», - dedi Pavlodar oblystyq aýyl sharýashylyǵy basqarmasynyń basshysy Nurbolat Maqashev.
Pavlodardyń aýylsharýashylyq ónimderi astanalyqtar arasynda úlken suranysqa ıe ekenin jármeńke bastalǵannan halyqtyń kóptep kelýinen baıqaýǵa bolady.
«Osyndaı jármeńkelerdiń qoljetimdi baǵamen uıymdastyrylýy qýantady. Mysaly, ózimizde 2200 teńge turatyn etti, jármeńkeden 1740 teńgege satyp aldym. Tıimdi saýda boldy», - dep óz oıymen bólisti elorda turǵyny Bıbiǵaısha Bójenova.
Aýyl sharýashylyǵy basqarmasy basshysynyń aıtýynsha, bıyl Pavlodar oblysynda agrarlyq ónimderdiń kólemi ótken jylmen salystyrǵanda 30% artyq bolady dep kútilýde.
Eki kún boıy ótetin jármeńke aıasynda oblystyq fılarmonııanyń kontserti uıymdastyrylady.
