Astanalyqtar Patrısııa Kaastyń kontserttik baǵdarlamasyn tamashalaıdy
ASTANA. 22 qazan. QazAqparat - 30 qarashada «Qazaqstan» kontsert zalynda tanymal frantsýz ánshisi Patrısııa Kaastyń kontserti ótedi. Bul týraly elordanyń resmı saıty habarlady.
Kontsert Qazaqstandaǵy Frantsııa jyly aıasynda uıymdastyrylady. Patrısııa kórermender nazaryna áıgili frantsýz oryndaýshysyn eske alýǵa arnalǵan «Kaas Pıafty jyrlaıdy» shoý baǵdarlamasyn usynady. Sebebi, qarlyqqan daýys ereksheligi jaǵynan ony Edıt Pıafqa jıi uqsatady.
Baǵdarlamaǵa kópshilik súıip tyńdaıtyn Padam - Padam, Je t'ai dans la peau, sonymen qatar orys tilindegi birqatar ánder engen.
Qazirgi kezde P.Kaas Reseıde kontsert berip júr. Ol Túmen, Samara, Qazan, Chelıabi, Perm, Ijevsk qalalaryn aralaıdy. Astanadaǵy kontsertten keıin Sankt-Peterbor jáne Máskeý qalalarynda óner kórsetedi. Ánshiniń aıtýynsha, onyń jetistikke jetýiniń basty sebebi - gastrolder, Kaas udaıy shetelderde júredi. Onyń 2013 jylǵy gastroldik kestesinde 150 kontsert belgilengen.
Aıta keteıik, Kaastyń repertýary pop-mýzyka men klassıkalyq shanson aralasqan ánderden turady. 1988 jyly Kaastyń alǵashqy «Mademýazel shyrqaıdy» atty albomy jaryqqa shyqqan soń álem boıynsha 17 mıllıonnan astam jazbasy satylǵan.
