Astanalyqtar óz quramyn afrıkalyq jáne rýmynııalyq qorǵaýshylarmen kúsheıtpek
ALMATY. 28 aqpan. QazAqparat - Astanada endi Ortalyq-Afrıka Respýblıkasy quramasynyń oıynshysy óner kórsetetin boldy. Búgin komanda basshylyǵy qorǵaýshylar afrıkalyq Foksı Ketevoama men rýmynııalyq Emıl Dıkemen eńbek kelisim-shartyn jasasty.
1986 jyly 30 mamyrda ómirge kelgen F. Ketovoama «Astanaǵa» Koreıanyń Birinshi dıvızıonyndaǵy «Ýlsan Hende» komandasynan aýysyp keldi. Onda «Kapoşvar» komandasynan 2009 jyldyń kúzinde aýysyp kelgen ol ótken jyly 53 match ótkizip, 14 ret mergendik tanytqan edi. «Ýlsan Hende» 2011 jyly Azııa fýtbol konfederatsııasy Chempıondar lıgasynda 2-oryn alyp, Azııa sýperkýbogynda birinshi, al 2010 jyly Azııa fýtbol konfederatsııasy kýbogynda birinshi oryn alǵan bolatyn.
29 jastaǵy Emıl Kosmın Dıke bolsa buǵan deıin negizinen Rýmynııa chempıonatynda ǵana óner kórsetip kelgen edi. Kásibı mansabyn 21 jasynda Pıteshty qalasynyń «Ardjesha» komandasynan bastaǵan ol odan keıin «Rapıde» men «ChFR Klýj» komandalarynda óner kórsetti. Onda el chempıonatynyń altyn, kúmis jáne qola júldesin ıelenip, 3 márte kýbokty, 2 ret sýperkýbokty jeńip aldy. Sondaı-aq ÝEFA kýbogynda, Chempıondar lıgasy men Eýropa lıgasynda 22 match ótkizdi. 2011 jyldyń jazynda Grekııanyń «Shkoda Ksantı» komandasyna aýysqan ol endi óz nesibesin Qazaqstan Premer-lıgasyndaǵy «Astana» komandasynda baq synap kórmek.
