Astanalyqtar Olımpıada sportshylaryn qoshemetpen qarsy aldy
QR Ulttyq olımpıada komıtetiniń habarlaýynsha, uzaq joldan sharshaǵanyna qaramastan, jas atletter týystary men jaqyndarynyń quttyqtaýyna rıza bolyp, BAQ ókilderine emen-jarqyn suhbat berdi.
«Qazirgi kóńil-kúıimdi sózben jetkize almaımyn. Tún jarymyna qaramastan, bizdi kútip alýǵa qanshama adam kelgen! Tipti, kózime jas aldym. Bizge qoldaý kórsetip, biz úshin taqym qysqan barsha aǵaıynǵa rahmet! Jankúıerlerdiń senim údesinen shyǵa alǵanymyz - úlken baqyt», - deıdi Olımpıada chempıony, velosportshy Gleb Brýsenskıı.
«Dál osylaı qarsy alǵany úshin rahmet! Árıne, bizdi kútip alatynyn bildik. Biraq tap osynsha kóp adam jınalady dep oılamaǵan ek. Kóp rahmet!», - deıdi Glebtiń komandalasy Evgenıı Fedorov.
«Elge oraldyq. Kútip alǵan kisilerge kóp rahmet. Jeńisti kúnderimiz kóp bolsyn», - deıdi dzıýdodan altyn júldeger atanǵan Bekarys Sádýaqas.
Qazaqstan qurama komandasy sapyndaǵy eń jas sportshylardyń biri Roza Abıtova halyqaralyq komanda sapynda Olımpıadanyń kúmis júldegeri atandy. Ol ózine qoldaý kórsetken jankúıerlerge alǵysyn aıtyp, rızashylyǵyn bildirdi.
«Jyraqta júrip jeńip alǵan medaldiń qanshalyqty baǵaly ekenin elge kelgen soń túsinesiń. Mundaı sátterde kórsetilgen qoldaý óte mańyzdy. Elimizde biz úshin qýanatyn adamdar kóp. Mine, sol jandar úshin de jeńiske jetkim keledi», - dep aǵynan jaryldy dzıýdodan jasóspirimder Olımpıadasynyń kúmis júldegeri Margarıta Grıtsenko.
Jasóspirimder Olımpıadasynyń qola júldegeri Stella Sýhanova da komandalastarynyń tilegine qosylyp, jankúıerlerge alǵysyn jetkizdi.
Esterińizge sala keteıik, Býenos-Aıreste Qazaqstan sportshylary tórt altyn, úsh kúmis jáne úsh qola medalmen jalpy esepte 15-orynǵa qol jetkizgen bolatyn. Bul jasóspirimderimizdiń Olımpıada oıyndaryndaǵy ázirge eń joǵarǵy jetistigi. Odan bólek, halyqaralyq komanda sapynda jas sportshylarymyz 1 kúmis jáne 1 qola medal ıelendi.
Altyn júldegerler: Bekarys Sádýaqas (dzıýdo), Dıas Bahraddın (eskek esý), Gleb Brýsenskıı men Evgenıı Fedorov (velosport), Aıbek Oralbaı (boks).
Kúmis júldegerler: Damır Toıbaı (boks), Talǵat Sháıken (boks), Margarıta Grıtsenko (dzıýdo).
Qola júldegerler: Nadejda Rıabets (boks), Stella Sýhanova (eskek esý), Ábilmansur Batyrǵalı (karate).
Halyqaralyq komanda sapynda Roza Abıtova (kórkem gımnastıka) kúmis, Bekarys Sádýaqas (dzıýdo) qola medal jeńip aldy.
ІІІ Jazǵy jasóspirimder olımpıadasy 6-18 qazan aralyǵynda ótti. Oǵan 206 memleketten 4 myń sportshy qatysty. Jarystar baǵdarlamasyna sporttyń dástúrli 28 túrinen bólek, sporttyq bıler (breık-dans), karate, taýǵa órmeleý, rolıkpen syrǵanaý qosyldy.
Baıraqty dodada el namysyn 58 sportshy qorǵady.
