Astanalyqtar «Men qazaqpyn» jobasynyń irikteý kezeńine shaqyryldy
ASTANA. QazAqparat - Astanada «MEN QAZAQPYN» halyqaralyq televızııalyq jobasynyń qalalyq irikteý kezeńi ótedi, dep habarlaıdy QazAqparat «Qazaqstan» RTRK AQ baspasóz qyzmetine silteme jasap.
«Qymbatty ulttyq ónerdi ulyqtap júrgen ónerpazdar, sizderdi Astana qalasyndaǵy «MEN QAZAQPYN» mega jobasynyń irikteý týryna qatysýǵa shaqyramyz. Baıqaýda 19 ben 40 jas aralyǵyndaǵy dástúrli ánshiler, kúıshiler men termeshiler baq synaı alady», - delingen.
Іrikteý 17 shilde kúni 14:00-de EKSPO aýmaǵyndaǵy «Nomad sıtı» holynda ótedi.
Aıta keteıik, respýblıkamyzdyń jáne ózge elderdegi qandastarymyzdyń dástúrli ánshi-termeshi, kúıshileriniń basyn qosyp, atadan-balaǵa mıras bolyp qalǵan tól ónerimiz kúı, jyr-termeni nasıhattaýdy kózdeıtin «Men qazaqpyn» xalyqaralyq jobasy bıyl ekinshi ret uıymdastyrylyp otyr. Búginde irikteý kezeńderi barlyq óńirlerde ótýde.
Ótken jyly «Men qazaqpyn» megajobasyna 3 myńnan astam adam qatysýǵa ótinish bildirgen. Іrikteýler Qytaı, Reseı men Mońǵolııa jerinde de ótti. Al Astanadaǵy týrǵa 57 adam irikteldi. Qazylar alqasynyń sheshimine sáıkes, «Úzdik ánshi» atalymynyń jeńimpazy Taldyqorǵan qalasynyń abyroıyn aspandatqan Beıbit Musaev atandy. «Úzdik kúıshi» atalymynda aqtóbelik Ardaq Eleýsiz daralandy. «Úzdik termeshi» atalymyn mańǵystaýlyq Ospan Qulsymaq jeńip aldy. Al Jambyl oblysynyń ókili Sulýjan Ábenova eń kóp daýys jınap, «Kórermen kózaıymy» atandy.
