Astanalyqtar mektepke jabdyqtaryn 50 paıyz jeńildikpen alýda
ASTANA. 24 tamyz. QazAqparat - Búgin elordanyń qalalyq alańynda «Mektepke jol» aktsııasy aıasynda 40 kásipkerdiń qatysýymen mektep jármeńkesi ótýde. Onda mektep formasy, aıaq kıimder, keńse zattary, rıýkzaktar, oqýlyqtar men basqa da mektep jabdyqtary satylady.
Barlyq ónimder 10%-25%, balalar kıimi 50% jeńildikpen satylýda.
«Búgin Astana qalasy ákimdiginiń qoldaýymen Almaty, Qaraǵandy jáne Shymkent qalalarynan kelgen 40-tan astam kásipkerdiń qatysýymen mektep jármeńkesi ótkizilip jatyr. Sonymen qatar, halyqqa zań konsýltatsııalaryn beretin qoǵamdyq qabyldaýlar jumys isteıdi. Al Oqýshylar saraıy men balalar úıiniń oqýshylarynyń qatysýymen kontsert uıymdastyrylady», - dedi astana.kz saıtyna Balalar quqyǵyn qorǵaý basqarmasynyń bas mamany Saltanat Basyǵaraeva.
Jármeńke kezinde 4 qoǵamdyq tamaqtaný orny bolady. Іs-shara saǵat 10.00-17.00 deıin ótedi.
Astana qalasynyń turǵyndary jármeńkege oraı óz pikirlerimen bólisti. «Mektep oqýshylary úshin osyndaı jeńildikter jasaǵan uıymdastyrýshylarǵa kóp-kóp rahmet. Sebebi, qazirgi zamanda bazarlardaǵy baǵa sharyqtap tur, árıne, onda buǵan qaraǵanda qymbatyraq. Balalaryn mektepke áli jınap úlgermegen ata-analar búgin keregin ala alady. Jaqsy áserde qaldym, kontsert te ótip jatyr, adamdardyń da kóńil-kúıi jaqsy», - dedi astana.kz saıtyna mektep jármeńkesine kelgen Nazıra Ábdildına.
Eske salaıyq, kelesi mektep jármeńkesi 30 tamyzda ótedi.
