Astanalyqtar quryltaıǵa kelgen qandastarymyzdy qarsy aldy
ASTANA. 24 mamyr. QazAqparat/Aınur Kenebaeva/ - 24-28 mamyr aralyǵynda elordada Dúnıejúzi qazaqtary qaýymdastyǵynyń ІV quryltaıy ótedi.
Osyǵan oraı, astanalyqtar quryltaıǵa kelgen qandastarymyzdy Astana vokzalynda qarsy aldy. Búgin 40 shaqty shet elde turatyn qazaq dıasporasynyń 350-den astam ókili Saryarqa topyraǵyna taban tiredi.
Aıta ketelik, 1992 jyly QR Prezıdenti Nursultan Nazarbaevtyń tikeleı basshylyǵymen Almaty qalasynda tuńǵysh ret Dúnıejúzi qazaqtarynyń quryltaıy ótken bolatyn. Ár bes jyl saıyn bir ret shaqyrylatyn quryltaı alys-jaqyn shet eldegi qazaq dıasporasyn biriktirip, qazaqtyń tynys-tirshiligimen tamyrlas jatqan keleli máselelerdi talqylaıdy.
Ǵalymdar, óner maıtalmandary, qoǵam qaıratkerleri, eńbek ardagerleri men jasóspirimderden quralǵan arnaıy delegatsııany elimizdiń Kákimbek Salyqov, Nurǵoja Oraz, Orazkúl Asanǵazyqyzy, Muhambedııa Ahmet-Tóre syndy tanymal tulǵalardan quralǵan zııaly qaýym ókilderi qushaq jaıa qarsy alyp, aq jaýlyqty ájelerimiz qandastarymyzdyń qurmetine "qadamdaryn qutty qylsyn" degen nıetpen qazaqı dástúrmen shashý shashty. Qany men jany qazaq dúıim qazaq jurtshylyǵy jatyrqaspaı qaýyshyp, saǵynysh saryndy arnaý aıtyldy.
«Qıyndyǵy kóp bolsa jol basynyń,
Tapty elim birlikpen qoldasýyn.
Soqtyqpaly, soqpaqsyz tar kezeńdi
Jeńdi aqyl-qaıraty Elbasynyń.
Ár sózimnen bilinse otty lebiz,
Jan-júrektiń qalaýyn jetkizemiz.
Alla jar bop quryltaı sátti ótse,
Bir basylar saǵynysh-nesibemiz», - dep alystan at arytyp kelgen qandastarymyzǵa aqyn Kákimbek Salyqov júrekjardy jyr joldarymen týǵan jerdegi barlyq qazaq baýyrlarynyń iltıpatyn jetkizdi.
