Astanalyqtar kóshedegi músinderdi synǵa aldy
ASTANA. QazAqparat - Búgin elorda ákiminiń orynbasary Qosman Aıtmuxametovtyń xalyqqa esep berý kezdesýi kezinde astanalyqtar kóshedegi músinderdi ózgertýdi surady, dep xabarlaıdy QazAqparat tilshisi.
«Men bir ǵana mysal aıtaıyn, Respýblıka dańǵyly men Kenesary kóshesiniń buryshynda aıaǵy joq, qoly joq, shlıapa kıgen bir shal tur. Ony ne úshin qoıdy? Men kúnde sol jerden ótemin, ketip bara jatqanda júregim aýyrady. Osyndaı bir keregi joq nárseni ne úshin qoıady?», - dedi Janas esimdi qala turǵyny.
Ony qoǵamdyq keńestiń tóraǵasy Sansyzbaı Esilov ta qoldady. «Shynymen de, eski qalanyń ortalyǵynda keıbir aıaǵy joq músinderdiń keıpi xalqymyzdyń mádenıetine de, saltyna da tán emes. Qosman Qaıyrtaıuly, osyny baıqańyzshy? Óıtkeni keıbir sýretshiler músinderin usynady da, ony bizge keremet týyndy retinde kórsetedi. Ózimizdiń ultymyzǵa, rýxymyzǵa tán bir músinderdi qoıýǵa bolady ǵoı. Negizi, sol músinderge qatysty xalyq tarapynan aryzdar kóp aıtylady», - dep atap kórsetti S.Esilov.
Ákim orynbasary Qosman Aıtmuxametovtyń aıtýynsha, barlyq músinderdi aýdan ákimderiniń sáýlet basqarmasymen kelisip ornatady. Osy oraıda ol atalǵan máseleni jiti baqylaýǵa alýdy tapsyrdy.
Foto: astana.gov.kz
