Astanalyqtar kópqabatty úılerin penoplekspen qaptatyp jatyr
ASTANA. QazAqparat - Abylaı xan dańǵyly boıynda ornalasqan bes qabatty úıdiń turǵyndary turǵyn-úı sharýashylyǵyn jańǵyrtý baǵdaralamasyn paıdalanyp, barlyq ınjenerlik jelilerin, kireberisterin jańartyp aldy, tipti úıdiń syrtyn qaptatyp aldy. Biraq ol úıde páterlerdiń sany az bolǵannan keıin árbir adamǵa bir mıllıon teńgeden astam tólemaqy shyqty, dep xabarlaıdy QazAqparat tilshisi.
Atalǵan turǵyn úıdiń salynǵanyna 30 jyldan asty. Osy ýaqyttyń ishinde jertóledegi ınjenerlik jeliler tozyp, kireberisterdiń qabyrǵalary úgitile bastaǵan. Osyǵan baılanysty páter ıelenýshiler turǵyn-úı jańǵyrtý baǵdarlamasyna qatysyp, kópqabatty úılerin tolyǵymen jańartyp alǵandy jón kórdi. Іshki jumystarmen birge syrtqy jumystarǵa da tapsyrys berdi. Úıdiń kóshege qaraıtyn jaǵyn tolyǵymen penoplekspen qaptatyp aldy. Endi, onyń ústinen sylaq jaǵylmaqshy. 
«Túrkistan» páter ıelenýshiler kooperatıviniń tóraıymy Lıýbov Karakýlkonyń aıtýynsha, búginde bir úıdiń 70 paıyzdan astam turǵyndary óz kelisimin berse, turǵyn-úı sharýashylyǵyn jańǵyrtý jumystary bastalady.
«Biz osy jolǵy jumystardy bylaı uıymdastyrdyq. Birinshi qabattyń turǵyndary jertóledegi qurylys jumystaryn baqylasa, ekinshi qabattaǵylar kireberisterdi qadaǵalap otyrdy. Úshinshi qabat - qasbetke, odan joǵary qabatta turatyndar tóbege jaýapty boldy. Sóıtip, árbireýimiz atsalysyp, qurylys jumystarynyń sapasyn baqyladyq. Jalpy, osy úıdiń jumystary 58 mıllıon teńgege baǵalandy. Páterlerdiń sany - 56. Demek, árbir páter ıelenýshi 1 mıllıon teńgeden tóleıtin bolady. Ony 15 jylǵa sozyp beredi», - deıdi kooperatıv basshysy. 
Onyń sózine qaraǵanda, turǵyndar aqshany arnaıy qorǵa jınaǵan jaǵdaıda qurylys jumystary 2 mln. teńgege arzan túsetin edi. Alaıda búginde páter ıelenýsheleri ondaı qordy jınaýǵa asyqpaıdy. Sebebi ol aqsha talan-tarajǵa túsedi de oılaıdy.
