Astanalyqtar kómirdiń qaı túrin kóp satyp alady
ASTANA. QazAqparat - Búgin elorda ákimdigi qala turǵyndary arasynda qandaı kómirge suranys joǵary ekendigin aıtty, dep habarlaıdy QazAqparat tilshisi.
«Bizde Shubarkól kómiri kóp jaǵylady. Dál osy kómirge turǵyndar arasynda suranys óte joǵary. Muny biz kómirdiń satylymyna júrgizilgen saraptama arqyly bilemiz. Aǵymdaǵy jyldyń maýsymynda ótken jyldyń sáıkes kezeńimen salystyrǵanda bul qatty otyn úsh ese kóp jetkizilgen. Qazir ýaǵdalastyq bar, kún saıyn Astanaǵa shamamen 20 tonna kómir jetkilizip otyrady», - dedi Astana qalalyq otyn-energetıkalyq kesheni jáne kommýnaldyq sharýashylyq basqarmasynyń bólim bastyǵy Maqsat Ysmaǵulov.
Sonymen qatar ol Astana ákimdigi basqa da kenishterdiń kómirlerin elordaǵa jetkizý jumystaryn júrgizip jatqanyn aıtty.
«QR Investıtsııalar jáne damý mınıstrligi belsendi jumystar júrgizip, nátıjesinde Maıkúbi ken ornynan kómir jetkizý kólemi 2 esege ulǵaıdy. Suranystyń joǵary bolýyna baılanysty bul baǵytta jumystar jalǵasyp jatyr. Qarajyramen de osyndaı jumystar júrgizýdemiz. Degenmen, bul kenish bizge jóneltip úlgere almaı jatyr. Al jalpy bizde Shubarkól kómiri óte tanymal. Onyń birneshe túri bar, qalanyń úsh núktesinde satylady. Bul kómirdiń kúli az, jaqsy janady. Qazir bári qoıyp jatqan arnaıy peshterge joǵary surypy jaqsy keledi», - dedi ol.
M.Ysmaǵulovtyń aıtýynsha, kómir baǵasy elordadan da joǵary óńirler bar. Máselen, Soltústik Qazaqstan aýmaǵynda qatty otynnyń tonnasy 17-20 myń teńgeni quraıdy.
Aıta keterligi, Astana qalalyq otyn-energetıkalyq kesheni jáne kommýnaldyq sharýashylyǵy basqarmasy basshysynyń orynbasary Baǵdat Baısadyqov elordada 20 táýlikke jetetin otyn qorynyń bar ekendigin aıtqan bolatyn, al Maqsat Ysmaǵulov kómir alypsatarlarymen kúres júrgizilip jatqanyn atap ótken.
