Astanalyqtar karantınge qaramastan 100 adam jınap, toı ótkizgen

NUR-SULTAN. QazAqparat - Elordanyń monıtorıngilik toptary kásipkerler arasynda karantın talaptaryn qasaqana buzýshylardy anyqtaýda. Qalada karantınniń kúsheıtilgenine qaramastan, ótken táýlikte birden eki toı ótkizilip, oǵan 100 adam qatysty, dep habarlaıdy QazAqparat.

Qala ákimdiginen málim etkendeı, 27 maýsym kúni karantın rejımin buzǵan 5 mekeme anyqtaldy. Esil aýdanynda ornalasqan «Portofino» meıramhanasynda 100 adamǵa arnalǵan toı ótken. Mekemede qalalyq sanıtarlyq dárigerdiń qaýlysynda kórsetilgen shekteý sharalary saqtalmaǵan.

Al Almaty aýdanyndaǵy «Baq saraı» meıramhanasynda 100 adam qatysqan shara ótti. Sol sııaqty «Esh, peı» barynda da áleýmettik araqashyqtyq buzylǵan.

Karantın rejımin buzǵany úshin Baıqońyr aýdanyndaǵy «Mýstang» kafesi men Saryarqa aýdanyndaǵy «Panaehalı» barynyń qyzmetkerleri betperde kımegeni úshin ákimshilik jaýapkershilikke tartyldy.

Tártip buzýshylarǵa qatysty jınalǵan materıaldar tıisti sharalar qoldaný úshin aýdandyq sanıtarlyq-epıdemıologııalyq baqylaý basqarmalaryna jiberildi.

«Esterińizge sala keteıik, epıdemıologııalyq ahýalǵa baılanysty elorda áli de «qyzyl» aımaqta. Buǵan qosa naýqastar arasynda tez taralyp, ımmýnıtetti álsiretetin koronavırýstyń «Delta» shtamy anyqtaldy. Qazirgi jaǵdaıǵa baılanysty elorda turǵyndary men qonaqtary, sondaı-aq kásipkerler dárigerlerdiń nusqaýlary men sanıtarlyq normalardyń bárin qatań túrde saqtaýy tıis», - dedi ákimdikten.