Astanalyqtar halyqaralyq tsırk festıvali aıasynda kerik pen múıiztumsyqtyń ónerin tamashalaı alady
ASTANA. QazAqparat - Búgin, 2 shildede dástúrge aınalǵan «Azııa jańǵyryǵy» halyqaralyq tsırk óneri festıvali ashylady. Jyl saıynǵy shara kórermenderin bıyl da tánti etpek. Búgin astanalyqtar festıvaldiń jarqyn sharalarynyń biri - dástúrli kavalkadany tamashalady. Tsırk ártisteri úrmeli aspaptar orkestriniń súıemeldeýimen qala kóshelerimen júrip ótti, dep habarlaıdy elorda ákimdiginiń baspasóz qyzmeti.
Merekelik sherý Astanalyq tsırk janynan bastalyp, Qabanbaı batyr dańǵylymen, Dostyq kóshesimen, Túrkistan jáne Qonaev kóshelerimen júrip, Astanalyq tsırkke kelip toqtady.
Festıval qatysýshylary úlken avtobýsqa mindi. Sherýdi janýarlar, attar, ponı, túıeler bastap júrdi. Ótip bara jatqan adamdar men kólik júrgizýshileri parad qatysýshylaryn qoshemettep, estelikke sýretke tústi.
«Ádettegideı, jalpy, tsırk ónerin keńinen taratý úshin festıvaldi kavalkadadan bastadyq. Taǵy da bir sherý ótkizýdi josparlap otyrmyz», dedi Astanalyq tsırktiń shyǵarmashylyq damý jónindegi keńesshisi Vladıslav Bernatskıı.
Onyń aıtýynsha, bıyl Astanalyq tsırk kórermenderin jańa nomermen tań qaldyrmaq. Eki ártis kúrdeli janr - shteın-trapta óner kórsetpek. Tsırk óneri marafonyna segiz memlekettiń ártisteri qatysady. Belarýs, Gollandııa, Qazaqstan, Qyrǵyzstan, Mońǵolııa, Reseı, Túrkimenstan jáne Efıopııa elderiniń dúnıejúzilik festıvalderdiń júldegerleri men laýreattary, óz janrlaryndaǵy has sheberler, tsırk ónerindegi áýletterdiń urpaqtary ózderiniń vırtýozdyq kórsetilimderin qonaqtardyń nazaryna usynatyn bolady. Ártisterdiń kóbi elordalyq tsırk kúmbeziniń astynda alǵash ret óner kórsetetin bolady.
«Bıyl festıvalge buryn-sońdy Qazaqstanda bolmaǵan ekzotıkalyq janýarlar qatysady. Reseıden úıretilgen kerik pen múıiztumsyq ákelinedi. Kerik úshin tóbelerdi alyp tastaýǵa týra keldi. Endi ol manejge óte alady, qazir daıyndalyp jatyr», - deıdi Vladıslav Bernatskıı.
Qala turǵyndary men qonaqtary tsırk óneri festıvalin shildeniń 2-si men 7-si aralyǵynda tamashalaıdy.
