Astanalyqtar flıýorografııalyq tekserýden tegin óte alady
ASTANA. QazAqparat - Astanada «Týberkýlezdi birge jeńemiz!» atty aýqymdy aktsııa ótedi, dep habarlaıdy QazAqparat qalalyq densaýlyq saqtaý basqarmasyna silteme jasap.
Aıtýly shara 2019 jylǵy 16 naýryzda saǵat 14:00-de «Evrazııa 3» (4-qabat) saýda ortalyǵynda, Dúnıejúzilik týberkýlezge qarsy kúres kúnine oraı uıymdastyrylyp otyr.
Týberkýlezge skrınıng júrgizýdi qalaıtyn azamattar kúni boıy Eýrazııa - 2 saýda ortalyǵynda ornatylǵan jyljymaly mobıldi flıýorografııada tekserýden tegin óte alady.
Sondaı-aq, shara barysynda Nıderland Syrtqy ister mınıstrliginiń (DGIS) qoldaýymen «AFEW Kazakhstan» qoǵamdyq qory, sonymen qatar «Týberkýlezdiń aldyn alý jáne baqylaý jónindegi Koroldik Nıderlandy qaýymdastyǵy» (KNCV) jáne «AFEW Kazakhstan» qoǵamdyq qory júzege asyrǵan «Fotodaýys» (Fotogolosa) psıhologııalyq jobasy tanystyrylmaq.
Odan bólek, balalar men eresekter úshin týberkýlezdiń aldyn alý taqyrybynda taǵdyry atalǵan aýrýmen baılanysty adamdar áńgimesin aıtyp, sonymen qatar túrli saýalnama jáne báıgeler uıymdastyrylady.
Densaýlyq basqarmasynyń deregine súıensek, sońǵy bes jylda respýblıkada týberkýlez aýrýyna shaldyǵý kórsetkishi 1,3 ese azaıdy. 2014 jyly elimizde aýrýdyń 11,5 myń jańa jaǵdaıy anyqtalsa, 2018 jyldyń sońyna qaraı 8,8 myń jaǵdaıǵa tómendedi. Sondaı-aq, sońǵy bes jylda Qazaqstanda týberkýlezden bolatyn ólim 1,5 ese azaıdy.
Aıta keteıik, týberkýlez aýrýyna qarsy kúres aktsııasyn densaýlyq saqtaý basqarmasy Almaty aýdany ákimdigi, Astana qalasynyń qoǵamdyq densaýlyq saqtaý basqarmasynyń jáne Astana qalasy týberkýlezge qarsy dıspanseriniń qoldaýymen ótkizgeli otyr.
