Astanalyqtar FIFA-2018 ashylý saltanatyn ashyq aspan astynda tamashalaı alady
ASTANA. QazAqparat - Fýtboldan FIFA-2018 Álem chempıonatyn Qazaqstan aýmaǵynda «Qazaqstan» jáne «QAZSPORT» telearnalary translıatsııalaıdy. Bul týraly «Qazaqstan» RTRK AQ basqarma tóraǵasy Erlan Qarın Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.
«Kórermenderimizdiń otandyq «Qazaqstan» jáne «QAZSPORT» telearnalary arqyly aýqymdy fýtbol oqıǵalaryn kóre alatynyna qýanyshtymyz. Biz álem birinshiliginiń barlyq 64 matchyn translıatsııalaımyz. Buǵan deıin «Qazaqstan» teleradıokorporatsııasy 6 jylǵa - 2017 jyldan 2022 jylǵa deıin 2018 jáne 2022 jyldary ótetin eki birdeı álem chempıonatyn translıatsııalaý quqyǵyn alǵan edi», - dedi ol.
Sondaı-aq, Erlan Qarın Álem kýbogy aıasynda josparlanǵan arnaıy jobalar týraly áńgimeledi.
«14 maýsym men 15 shilde aralyǵynda árbir match aldynda «Reseıdegi fýtbol merekesi» atty aqparattyq-taldaý baǵdarlamasy kórsetiledi, onda aldaǵy oıyndardyń erekshelikteri talqylanady. Sonymen qatar, chempıonat boıy jankúıerlerge «Ótken matchtarǵa sholý» kúndelikti jáne apta saıyn usynylmaq. «Álem chempıonattarynyń kaleıdoskopy» aqparattyq-tanymdyq baǵdarlamasy efırge shyǵyp úlgerdi, onda 1930 jyldan bastap, barlyq álem chempıonattarynyń qysqasha tarıhy, qyzyqty derekter beriledi. 14 maýsym kúni «Qazmedıa ortalyǵynyń» medıa fasadynda ashyq aspan astynda ÁCh ashylý saltanaty men Reseı-Saýd Arabııasy toptyq kezeńiniń matchyn tamashalaýǵa bolady. Tikeleı kórsetilim «Qazaqstan» telearnasy arqyly júrgizilmek. Astana turǵyndary men qonaqtaryn bul aýqymdy sharany birge kórýge shaqyramyz. Kórsetilim 14 maýsym kúni 19:30-da «Nurjol» jelekjoly jaǵynda uıymdastyrylady», - dedi Erlan Qarın.
Eske sala ketsek, Fýtboldan 21-shi álem chempıonaty 14 maýsym - 11 shilde kúnderi Reseıdiń 11 qalasynda ótedi. Alǵashqy match 14 maýsymda Máskeýdegi tanymal «Lýjnıkı» stadıonynda ótedi. Toptyq kezeń 28 maýsymda aıaqtalady, al fınallyq oıyn 15 shildege josparlanǵan. Chempıonatqa álemniń 32 úzdik ulttyq quramalary qatysady.
Kezdesýler Reseıdiń 11 qalasynda - Máskeý, Volgograd, Ekaterınbýrg, Qazan, Kalınıngrad, Tómengi Novgorod, Rostov, Samara, Sankt-Peterbýrg, Saransk jáne Sochıde uıymdastyrylady.
