Astanalyqtar eńbek mıgranttaryna máskeýlikter sııaqty qyryn minez kórsetpeıdi
ASTANA. 28 shilde. QazAqparat - Astanalyqtar alabóten eńbek mıgranttaryna máskeýlikter sııaqty qyryn minez kórsetip, «kelimsekter» dep kemsitpeıdi.
Áleýmettik-saıası zertteler ınstıtýtynyń áleýmettik suraý nátıjeleri osyndaı boldy.
Instıtýt sarapshylary Astana qalasynyń 18 jáne odan joǵary jastaǵy 455 turǵynynan olardyń eńbek mıgranttaryna degen kózqarasyn bilmek úshin saýalnama júrgizdi.
«Tabys úshin kelgenderdiń Sizderdiń qala úshin jaǵymdy áserin kóre alasyz ba?» degen saýalǵa 33,3 paıyzy eńbek mıgranttary jergilikti turǵyndardyń istegisi kelmeıtin jumysty isteıtindikterin aıtqan. Suralǵandardyń 40 paıyzy ózge elden kelgender arzan jumys kúshi dep sanaıdy, al 27,3 paıyzy - qurylys sektoryn qamtamasyz etedi dep esepteıdi. Bir qyzyǵy respondentterdiń 15,2 paıyzy mıgranttar páterdi jalǵa beretin jergilikti turǵyndarǵa paıda ákeledi dep aıtqan.
Alaıda eńbek mıgranttarynan keletin jaǵymsyz tustaryn baıqaǵan turǵyndar da bar. Elordalyqtardyń 1\4-i olardyń shamadan tys kóp kelýi qaladaǵy qylmystyq ahýalǵa keri áserin tıgizedi degen senimde, taǵy bir bóligi mıgranttardyń óz eńbegi úshin az eńbekaqy talap etýi, Astanadaǵy ortasha jalaqy deńgeıiniń tómendeýine ákep soqtyratyndyǵyna ýáj aıtyp otyr. 24 paıyzy jergilikti turǵyndardyń eki qolyna bir kúrek tabylmaı qala ma dep úreılenedi. 22 paıyzynyń mıgranttarmen istelinip jatqan jumystyń sapasyna kóńilderi tolmaıdy.
Osyǵan qaramastan 68,4 paıyz astanalyq eńbek mıgranttaryna beıtarap kózqaras tanytady eken. Al 15,6 paıyzy olarǵa oń kózqaraspen qarap, tipti olarǵa kómektesýge de daıar. 9,7 paıyzy olarǵa teris pikirde. Astanalyqtardyń deni eńbek mıgranttary áleýmettik qaqtyǵystarǵa sebepshi bolady dep eseptemeıdi (41,5 paıyz).
