Astanalyqtar elorda jylnamasyna óz atyn engize alady
ASTANA. QazAqparat - «Astana jylnamasyna óz atyńdy jaz» aktsııasy elordalyqtarǵa óz atyn Ulttyq muraǵat qoryna máńgi engizýge múmkindik beredi, dep habarlaıdy elorda ákimdiginiń resmı saıty.
«Kóptegen adamdar muraǵatta qujattarmen qatar Ulttyq muraǵat qoryn toltyrǵan jeke tulǵalar týraly derekterdiń saqtalatynyn bile bermeıdi. Eger sizde Astana, Aqmola, Tselınograd tarıhy týraly qujattar bar bolsa, olardy Astana muraǵatyna usynyńyz», - delingen Astana qalasynyń memlekettik muraǵatynyń Facebook jelisinde taratqan habarlamasynda.
Muraǵattyq materıaldar sanatyna qaǵaz qujattar (hattar, kúndelikter, kitaptar, gazetter jáne t.b), sondaı-aq foto, beıne, aýdıo-materıaldar, kınohronıka, eksponattar jáne basqa da tarıhı artefaktiler engizilýi múmkin.
Tarıhı qujattardy usynǵan azamattarǵa Astana tarıhynyń saqtalýyna úles qosqandyǵy týraly qujat beriledi.
Materıaldar elektrondyq túrde muraǵattyń elektrondyq poshtasynda qabyldanady (astana.gorarhiv@mail.ru).
Baılanys telefony: 8 (7172)249054.
Aktsııa Memleket basshysynyń «Uly dalanyń jeti qyry» atty baǵdarlamalyq maqalasyndaǵy tapsyrmalardy júzege asyrý aıasynda júrgizilip jatyr.
