Astanalyqtar dárigerdiń qabyldaýyna mobıldik qosymsha arqyly jazyla alady
ASTANA. QazAqparat - Elordada Smart densaýlyq saqtaý júıesi iske qosylady.
Bul týraly búgin xalyqpen eseptik kezdesýinde Astana ákimi Áset Isekeshev málim etti.
Elorda basshysy aldymen turǵyndarǵa Astanada «Biryńǵaı medıtsınalyq aqparattyq Call-ortalyq» jobasy iske qosylǵandyǵyn eske saldy. 2017 jyly atalǵan qyzmet táýlik boıǵy jumys kestesine kóshirilip, azamattar densaýlyq saqtaý máseleleri boıynsha barlyq mazalaǵan suraqtaryna jaýap alýǵa, «103» biryńǵaı telefony arqyly táýligine 24 saǵat boıy dárigerge jazylýǵa múmkindik aldy.
Ákimniń aıtýynsha, joba aıasynda turǵyndar emxanadaǵy dárigerlerge smartfondaǵy arnaıy qosymsha arqyly úıde otyryp-aq jazyla alatyn bolady.
«Medıtsınalyq qyzmetkerlerdiń qaǵazbastylyqtan bosamaýy - úlken másele. Ony sheshý maqsatynda naýqastyń Biryńǵaı elektrondyq medıtsınalyq kartasyn engizý jobasy ilki rejimde engizildi. Bul - halyqqa kórsetiletin medıtsınalyq qyzmetterdiń sapasyn arttyrýǵa jáne elordadaǵy emhanalarda qujataınalymdy alyp tastaýǵa múmkindik berdi», - dedi ákim.
