Astanalyqtar dárigerdiń qabyldaýyna ınternet arqyly jazyla alady

ASTANA. QazAqparat - Búgin Astana qalasynyń ákimdiginde «Áleýmettik áleýet - Astana aıbary» atty keńes barysynda Densaýlyq saqtaý jáne áleýmettik damý mınıstrligi men elorda ákimdigi arasynda memorandým qabyldandy. Ol boıynsha elordalyq mekemeler arasynda elektrondyq kezekter, dárigerler qabyldaýyna elektrondyq júıeni engizý kózdeledi.

Densaýlyq saqtaý jáne áleýmettik damý mınıstri Tamara Dúısenovanyń aıtýynsha, ákimdikpen aradaǵy memorandým negizinen ambýlatorııalyq-emhana uıymdaryndaǵy kezekterdi azaıtý máselesin qarastyrady. «Bul asa mańyzdy máselelerdiń biri. Óıtkeni, mınıstrlikke, mınıstrdiń blogyna tikeleı kelip túsetin árbir besinshi ótinish dál osy dárigerdiń qabyldaýyndaǵy kezekterge qatysty bolyp tabylady. Osy máseleniń sheshimin tabý úshin, birinshiden, dáriger qabyldaýyna elektrondyq júıemen jazylýdy jáne medıtsınalyq uıymdarǵa elektrondyq kezek júıesin engizýdi usynamyz. Bul tetik óz kezeginde kelýshilerge naq óziniń jazylǵan ýaqytynda dárigerdiń qabyldaýynda bolýyn qamtamasyz etedi. Al medıtsına uıymynan beriletin aqparat telefon nemese elektrondyq poshta arqyly júzege asýy tıis», - deıdi mınıstr T.Dúısenova.

Onyń sózine qaraǵanda, bundaı júıe búgingi tańda álemdik tájirıbede qoldanysta bar. Sonymen qatar Zeınetaqy tóleýdiń memlekettik ortalyǵynda da osy júıesi tolyqtaı júzege asyp jatyr. «Eń bastysy, medıtsınalyq uıymdar basshylyǵy dıspanserlik esepte turǵan patsıentterdiń kelip qaralý kestesin retteýleri kerek», - dedi mınıstr.