Astanalyqtar tsırkte úndi pilderi men qoltyraýyndardyń ónerin tamashalaıdy
ASTANA. QazAqparat - 23 aqpan - 25 naýryz aralyǵynda Astanalyq tsırk manejinde belgili ań úıretýshi Andreı Kornılov jetekshilik etetin «Indıra» tsırk shoýynyń gastroli ótedi, dep habarlady QazAqparat Astana ákimdiginiń baspasóz qyzmetine silteme jasap.
Baǵdarlamada jonglerler men ań úıretýshiler, ekvılıbrıster men áýe gımnastshylary, akrobattar men saıqymazaqtar, sondaı-aq 85-ten asa janýar óner kórsetedi. Onyń ishinde túıe, pýma, arystan, ıt, lama, pıton, qoltyraýyn, maımyl, jaıra jáne attar men úndi pilderi bar.
Bul janýarlardyń ásemdigi tánti etedi. Rango, Prettı jáne Margo atty pilder pıramıda quryp, eńbekteıdi, bıleıdi, sharǵa turady, mýzykalyq aspaptarda oınaıdy, sheńberler aınaldyrady. Tsırk artısteriniń óneri avtorlyq mýzykanyń jáne erekshe horeografııalyq qoıylymdardyń súıemeldeýimen ótedi.
Sıýjet boıynsha Indıra esimdi qyz túsinde jabaıy tabıǵat pen ekzotıkalyq janýarlardyń ǵajap álemine túsedi. Ol ertegi keıipkerlerin kezdestirip, qyzyqty saıahatqa attanady.
Kórermender ańyzǵa aınalǵan «Pildermen jer júzin aınalyp shyǵý saıahaty» attraktsıonynyń keıipkerleri Kornılovtar áýletimen tanysady. Bul manejge birden úsh úndi pili shyǵatyn álemdegi jalǵyz qoıylym.
Aıta keteıik, ań úıretýshi Andreı men Anastasııa Dementevter-Kornılovtar Máskeýde Tsırk óneriniń búkilálemdik festıvalinde «Altyn syılyǵy», Tsvetnoı býlvardaǵy Nıkýlın tsırkiniń Halyqaralyq tsırk óneri festıvalinde birinshi oryn jáne «Altyn pil» syılyǵyn, Ijevskide (Ýdmýrtııa) Halyqaralyq tsırk festıvalinde altyn júlde, Reseı memlekettik tsırk kompanııasynyń «Úzdik attraktsıon-2011» úshin «Sharı-varı» syılyǵyn, Reseı tsırk qaıratkerleri odaǵynyń «Úzdik artıst-2012» syılyǵyn (Andreı Dementev-Kornılov) jáne «Úzdik jyl attraktsıony-2015» nomınatsııasynda «Sheber» syılyǵyn, sondaı-aq Tsvetnoı býlvardaǵy Nıkýlın tsırkiniń Halyqaralyq tsırk óneri festıvaliniń «Altyn pil» Gran-prıin ıelengen.
Senbi kúni, 23 aqpanda, saǵat 16:00-de «Indıra» pilder tsırkiniń premerasy bastalady.
Ótkizý orny: Astana qalasy, «Astanalyq tsırk» MKQK, Qabanbaı batyr dańǵyly 5.
Tirkelý máselesi boıynsha myna telefondarǵa habarlasýǵa bolady: 24 40 59, + 7 7 702 478 00 38, + 7 705 411 27 15.
