Astanalyqtar bir-birin jalǵandyq detektorymen teksere alady
ASTANA. 5 tamyz. QazAqparat - Búgin Astanada Aqparattyń shynaıylyǵyn baǵalaý ortalyǵy ashyldy. Bul mekeme polıgraftardyń - jalǵandyq detektorlardyń sońǵy úlgilerimen qamtylǵan. Bul týraly elordanyń resmı saıty habarlady.
Mamandardyń aıtýynsha, ortalyqtyń mindeti - Qazaqstandaǵy psıhofızıologııalyq zertteýlerdi joǵary deńgeıge kóterý jáne sapany baqylaý, polıgrafologtardy oqytý jáne sapasyz tapsyrys berýshilerden qorǵaý bolyp tabylady.
AShBO-da irikteý, attestattaý, jedel-tergeý qyzmetin súıemeldeý, qylmystardy tergeý jáne qyzmettik tekserýler barysynda polıgraftyń kómegimen tekserý júrgizýge bolady. Ortalyqtyń qyzmetin paıdalanýshylardyń basym bóligi - zańdy jáne jeke tulǵalar, memlekettik qurylymdar.
Qazaqstan polıgrafologtar qaýymdastyǵynyń tóraǵasy, AShBO oqytý jumysy boıynsha dırektorynyń orynbasary Tatıana Pıvovarova klıenttermen tikeleı jumys júrgizedi. Sonymen qatar, Ortalyq jumysyna álemge áıgili polıgrofologtardyń biri, TMD aımaǵynda keńinen tanymal «Dıana» serııasyndaǵy polıgraf-apparatynyń jobalaýshysy ári avtory Aleksandr Soshnıkov pen Reseıdiń jetekshi polıgrafologtarynyń biri, ChanceCalc kompıýterlik algorıtminiń ámbebap kombınatorlyq-yqtımaldylyq modeliniń avtory Aleksandr Pelenıtsyn tartyldy.
Aqparattyń shynaıylyǵyn baǵalaý ortalyǵynyń ashylý saltanatyna QR Іshki ister mınıstrliginiń, QR Bas prokýratýrasynyń, QR Ulttyq Qaýipsizdik Komıtetiniń ókilderi qatysty.
