Astanalyqtar batys óńiriniń asqaq ánderi men tókpe kúılerin tyńdady
ASTANA. 3 qazan. QazAqparat - Astanada Aq Jaıyqtyń áýenderi qalyqtady. Keshe Qobyz saraıynda Batys Qazaqstan oblystyq fılarmonııasynyń shaǵyn ujymy elordalyqtarǵa «Shyrqal án, kúmbirle kúı» atty óner keshin syılady.
Kontsert eki bólimnen turdy. Áýeli kúmis kómeı ánshi, tanymal aıtys aqyny, Qazaqstannyń eńbek sińirgen qaıratkeri Qatımolla Berdiǵalıev «Aıman-Sholpan» epostyq dastandy jyrlap, kórermenderdiń ystyq yqylasyna bólendi.
Ol jyrdyń sońǵy shýmaǵyn oryndap bolǵanda, kórermender arasynan sahnaǵa kóterilgen ánshi, Qazaqstannyń eńbek sińirgen ártisi Qapash Qulysheva óziniń Ǵarıfolla Qurmanǵalıevtiń shákirti ekenin aıta kelip: «Qatımollanyń daýysyn estip otyryp, Ǵarıfolla Qurmanǵalıev qaıta tirilip kelgendeı kúı keshtim. Sizge degen halyqtyń qoshemeti aıryqsha. Eldiń alǵysyna bólenip, shyrqaı berińiz!»- dedi.
Odan keıin Ǵ.Qurmanǵalıev atyndaǵy oblystyq fılarmonııanyń ánshileri men kúıshileri óner kórsetti.
Belgili dombyrashy, Qazaqstannyń eńbek sińirgen mádenıet qyzmetkeri Ermek Qazıev elordalyqtar aldynda Qurmanǵazy, Seıtek, Dınanyń kúılerin sheber oryndap berdi. Respýblıkalyq baıqaýlardyń laýreattary Aqmaral Ahmetova men Kúlásh Qýanyshqalıeva Shámshi Qaldaıaqovtyń jáne batysqazaqstandyq sazgerlerdiń ánderin shyrqady.
Qatımolla Berdiǵalıevtiń shákirti Ernar Ómiráli Muhıt Meráliulynyń Aıdaıyn oryndaǵanda, «Áp, bárekeldi!» dep qoldaý kórsetken astanalyq kórermender de bir jelpinip qaldy. Ernar osyndaı qoshemetten soń, Aqan seriniń jáne Bazar jyraýdyń termesin kópshilik nazaryna usyndy.
Al Qatımolla Berdiǵalıev Qadyr Myrza Áliniń sózine jazylǵan «Aýyldy ańsaý» ánimen sahnaǵa qaıta shyqqanda, ánsúıer qaýym erekshe yqylas bildirdi.
Osy keshte jas ánshi Erkin Ótegenov qazirgi sazgerlerdiń ánderin shyrqady.
