Astanalyqtar aıaldamadaǵy elektrondy tablonyń aqparatyn telefonǵa ornata alady
ASTANA. QazAqparat - Astanada qańtardan bastap QR kodtar arqyly aqparatty skanerlep, aıaldamalar týraly aqparatty jedel túrde alýǵa múmkindik beretin qanatqaqty joba iske asyryla bastaıdy, dep habarlaıdy elorda ákimdiginiń medıa ortalyǵy .
Astananyń turaqty damýy ortalyǵynyń ókili Vıtalıı Pýstovoıtenkonyń bergen málimetterine qaraǵanda, atalmysh jobanyń aıasynda turǵyndar qaladaǵy aıaldamalarda ornatylǵan barlyq elektrondy tablodaǵy aqparatty óz telefondarynan kóre alady.
«Qanatqaqty jobany biz qańtar aıynda birneshe aıaldamada iske asyrmaqpyz. Telefonnyń kómegimen turǵyndar kodty skanerlep, dál sol mezette qaladaǵy barlyq elektrondy tabloda kórsetilgen aqparatty bile alady. Naqtyraq aıtqanda, QR kod qalada ornatylǵan barlyq elektrondy tablodaǵy aqparatty kóshiredi. Bul elektrondy tablo ornatylmaǵan aıaldamalarda qoǵamdyq kólikti kútýshiler úshin óte yńǵaıly qural bolmaq. Tıisinshe, adamdar aıaldamaǵa jetpeı-aq, aqparatty baqylaı alady», - deıdi Vıtalıı Pýstovoıtenko.
Turǵyndar tarapynan atalmysh joba qoldaýyn taýyp, suranysqa ıe bolyp jatsa, qajetti oryndardaǵy barlyq aıaldamalarǵa QR-kodtar ornatylady.
