Astanalyqtar Aıagózge kómek jınap jatyr
ASTANA. QazAqparat - Bastamashy top elordalyqtardy sý tasqynan zardap shekken ShQO-nyń aýyl-aımaqtaryna kómek qolyn sozýǵa shaqyrady. Kómekke kıim-keshek, azyq-túlik jáne qarjylaı kómek qabyldanady, dep habarlaıdy Elorda ınfo.
Aıta keteıik, 10 naýryz kúni qar sýy men jaýyn-shashyn saldarynan Shyǵys Qazaqstan oblysynyń Aıagóz aýdanyn sý basty. Osyǵan oraı, Astanada turatyn shyǵysqazaqstandyqtar bastama kóterip, úı-jaılary sý astynda qalǵan jerlesterine kómek jınaýda.
«Bizge jetken aqparatqa sáıkes, búginge Aıagózdiń ózinde 400-ge jýyq adam qaýipsiz jerge kóshirildi. Ózim sol eldiń týmasymyn. Kesheden beri el bolyp kómek jınap, qyzyl sýdan zardap shekken aýyldarǵa jóneltýdi jón kórdik. Tek jerlester ǵana emes, kez kelgen elordalyqtar qatysa alady. Aqshalaı kómekpen birge azaq-túlik, kıim-keshekter qabyldanady», - dedi Elorda ınfo tilshisine bastamashyl toptyń múshesi Medet Shamenov.
Onyń aıtýynsha, qazir jınalǵan zattar men azyq-túlikterdi elge jetkizý máselesi sheshilip jatyr.
«Bul bastamany qolǵa alǵanymyzǵa bir-aq kún. Qazirdiń ózinde halyq telefonmen habarlasyp, kómekti qalaı kórsetsek dep surap jatyr. Ázirge arnaıy esep shot joq. Aýdarylǵan aqshanyń ashyqtyǵyn qamatamasyz etý maqsatynda shot ashsaq pa dep otyrmyz. Sondaı-aq ShQO-nyń ákimdigi kelisemiz. Jınalǵan zattardy elge jetkizip berý úshin jerlester kólik jaldaımyz dep otyrmyz», - dedi ol.
Sý basqan Shyǵys Qazaqstan oblysyna kómek kórsetemin degen astanalyqtar 8701 400 5026 nómiri boıynsha Medet Shamenovke habarlasa alady.
Bul máselege qatysty Qazaqstan musylmandary dinı basqarmasy pikir bildirdi. Atap aıtqanda basqarma elordalyqtardy «Qaıyrymdylyq kerýeni» aktsııasyn qoldaýǵa úndedi. Búginnen bastap Astananyń barlyq meshitterinde sý tasqynynan zardap shekkenderge kómek zattaryn qabyldaý pýnkteri ashylady.
«Qazaqstan musylmandary dinı basqarmasy atalǵan aktsııany jyl saıyn ótkizip, sý jaılaǵan eldi-mekenderge gýmanıtarlyq kómek kórsetip otyrady», - dedi basqarmada.
