Astanalyqtar avtobýstar qozǵalysyn Internet arqyly baqylaı alady
ASTANA. 21 jeltoqsan. QazAqparat - Elorda turǵyndaryna qalalyq avtobýstar qozǵalysyn Internet arqyly baqylaı alatyn múmkindikter týdy. Qala kóshelerinde júretin barlyq avtobýs baǵdarlary KazInterSoft kompanııasynyń http://soft.kz/astanabus. saıtynda tolyq kórinedi.
Elordanyń resmı saıtynyń málimetinshe, atalǵan kompanııa ótken jyly Astananyń avtobýs parkin jaraqtandyrý jónindegi gps-monıtorıng jobasyn oryndaǵan bolatyn. Nátıjesinde onlaın tártibindegi jańalyq engizilip, atalǵan saıttan kez kelgen avtobýstyń baǵdaryn baqylaýǵa bolady.
Kompanııanyń atqarýshy dırektory Murat Turyspekov atalǵan servısti óziniń balalary únemi paıdalanatynyn aıtyp berdi. «Olar tizimnen kerekti avtobýsyn taýyp alady da, onyń qajetti aıaldamadan qansha qashyqtyqta ekendigin anyqtaıdy. Sóıtip, qysta aıazǵa tońbaı, úıden avtobýs aıaldamaǵa dál keler kezde shyǵa qoıady», - deıdi.
Sondaı-aq, ol elektrondy kartanyń kómegimen avtobýstyń qandaı jyldamdyqpen júrip kele jatqanyn, júrgizýshiniń baǵdardan basqa jaqqa aýytqymaǵanyn anyq bilip otyrýǵa bolatynyn da habarlady.
Kompanııanyń atqarýshy dırektorynyń aıtýynsha, servıske kompıýtermen qatar uıaly telefondardan, ıaǵnı Android tuǵyrynda smartfondardan da kire berýge bolady. «Osy servıstiń múmkindikteri týraly jan-jaqty aıtylǵan L.N. Gýmılev atyndaǵy EUÝ stýdentterimen kezdesý ótkizildi. Endi stýdentter ózderiniń uıaly telefondarynyń kómegimen kerekti avtobýstaryn baqylap, dál ýaqytynda shyǵady. Burynǵydaı aıaldamada bosqa turyp ýaqyt ótkizbeıdi», - dedi Murat Turyspekov.
