Astanalyqtar arzan qundyz ishik alamyn dep aldanyp qaldy
ASTANA. QazAqparat - Elordanyń polıtsııa departamenti krımınaldyq polıtsııa qyzmetkerleri ınternet-alaıaqtyq jasady degen kúdikpen 23 jastaǵy Taraz qalasynyń turǵynyn ustady. Bul týraly atalǵan vedomstvodan belgili boldy, dep habarlaıdy QazAqparat tilshisi.
Quqyq qorǵaýshylardyń málimetinshe, alaıaq Instagram áleýmettik jelisinde jalǵan akkaýnt ashyp, onda naryqtyq baǵadan álde qandaı arzanǵa qundyz ishikter men teri buıymdarynyń satylatyndyǵy týraly habarlama qaldyrǵan. Tipti satyp alǵan zatty úıine deıin jetkizip berýge ýáde bergen. Satyp alýshylardyń nazaryn aýdarý úshin jelige ádemi ishiktermen túsken sýretterin salyp, saýda úıleriniń jalǵan meken jaılaryn kórsetken. Klıenttermen tek WhatsApp arqyly baılanysqan. Alaıaq klıenttiń senimine kirgennen keıin taýardy úıine deıin ákelip beretindigin aıtyp, tolyq somany Qiwi-ámııanǵa aýdarýdy ótingen.
Astana qalalyq PD Krımınaldyq polıtsııa basqarmasynyń bólim bastyǵy Talǵat Bólegenovtiń aıtýynsha, alaıaqtyń sózine sengen satyp alýshylar onyń esep shotyna 100 myńnan 300 myń teńgege deıin aqsha aýdarǵan. Alaıaq aqshany alǵannan keıin akkaýntyn da, uıaly telefonyn da óshirip tastaǵan. Osylaısha, ol 7 adamnyń 1,5 mln teńgesin alǵan. Qazirgi ýaqytta onyń ústinen QR Qylmystyq kodeksiniń 190-baby boıynsha sotqa deıingi tergeý amaldary júrgizilip jatyr.
