Astanalyqtar ÁMS qoryna 17 mlrd teńgege jýyq jarna aýdardy
ASTANA. QazAqparat - Astana turǵyndary Áleýmettik medıtsınalyq saqtandyrý qoryna 17 mlrd teńgege jýyq jarna aýdardy, dep habarlaıdy QazAqparat «Áleýmettik medıtsınalalyq saqtandyrý qory» KEAQ Astana qalasy boıynsha fılıalynyń baspasóz qyzmetine silteme jasap.
Baspasóz málimetterine qaraǵanda, medıtsınalyq saqtandyrý júıesi - medıtsınalyq qyzmet sapasynyń jáne onyń qoljetimdiliginiń kepili. Medıtsınalyq saqtandyrý júıesin engizý halyqtyń medıtsınalyq qyzmetke degen kúnnen kúnge ósip kele jatqan suranysyn qanaǵattandyrady dep kútilýde.
Júıe iske qosylǵan 2017 jyldyń 1 shildesinen 2018 jyldyń 31 jeltoqsanyna deıingi aralyqta elordalyq jumys berýshiler men jeke kásipkerler mindetti áleýmettik medıtsınalyq saqtandyrý úshin 16,78 mlrd teńge jarna aýdardy. Bul respýblıka boıynsha aýdarylǵan jarnalar men aýdarymdardyń jalpy somasynyń (133 mlrd teńge) 12,62 % quraıdy. Jalpy, aımaqtyq turǵydan alǵanda, Astana medıtsınalyq saqtandyrý jarnalary - aýdarymdary boıynsha Almaty qalasynan (21,10%) keıin ekinshi orynda túr, úshinshi orynda - Qaraǵandy oblysy (8,20%).
Aýdarymdardyń negizgi bóligi jumys berýshilerge tıesili - 11 mlrd teńgeden astam qarjy, 6 mlrd teńgege jýyq qarajat - jeke kásipkerlerdiń jarnalary.
Esterińizge salamyz, mindetti áleýmettik medıtsınalyq saqtandyrý jarnalary, ıaǵnı jınaqtalǵan qarjy Ulttyq bankte saqtalady. Áleýmettik medıtsınalyq saqtandyrý qory Ulttyq bankpen senimgerlik basqarý týraly kelisimshart jasasqan. 2020 jyldan bastap bul qarajat Mindetti áleýmettik medıtsınalyq saqtandyrý paketi sheńberindegi qyzmetter aqysyn tóleýge jumsalady.
Osyǵan deıin jazylǵan retsept pen berilgen dári sáıkes kelmeıtin 10 medıtsınalyq mekeme anyqtalǵandyǵyn jazǵanbyz.
