Astanalyqtar alǵash ret Ulttyq dombyra kúnin atap ótpek
ASTANA. QazAqparat - Elordada Ulttyq dombyra kúnin merekeleý josparyna arnalǵan baspasóz máslıhaty ótti, dep habarlaıdy Astana ákimdiginiń resmı saıty.
Baspasóz máslıhatynda Ulttyq dombyra kúniniń qurmetine Astanada 1 shildede halyqtyq serýenniń ótetini belgili boldy. Astana qalasy Mádenıet jáne sport basqarmasynyń basshysy Bolat Majaǵulov málim etkendeı, aýqymdy sharaǵa kelýshiler qazaqtyń ulttyq aspaptary mýzeıiniń qonaǵy bolmaq.
«Dombyranyń kúmisteı syńǵyrlaǵan úni tógilip turatyn mundaı aýqymdy shara elordada buryn-sońdy bolmaǵan. Halyqtyq serýen 1 shildede «Qazaq Eli» monýmentiniń aldyndaǵy alańda ótedi. Munda kıiz úıler tigilip, qazaq ulttyq aspaptarynyń mýzeıi jumys isteıdi. Qonaqtar Qurmanǵazy, Dına Nurpeıisova, Ahmet Jubanov sııaqty uly tulǵalar, mýzykanttar oınaǵan dombyralardy óz kózimen kóredi. Kelýshiler nazaryna kıiz úılerdiń ishinde qazaq halqynyń basqa da ulttyq aspaptarynyń túr-túri qoıylyp, dombyra jasaý barysy kórsetiletin bolady. Mýzykanttar halyq shyǵarmalaryn oryndaıdy, Orteke ónerin kórsetedi», - dedi Bolat Majaǵulov.
Merekeniń kórkin elimizdiń myńdaǵan mýzykant-dombyrashysynyń qatysýymen ótetin «Dombyra - asyl mura» kontserti keltirmek.
Sahna tórinde Aıgúl Úlkenbaeva, Nurjan Tájikenov, Asylbek Eńsepov, «Art Dombyra» trıosy, MýzArt, Seken Turysbek, Bekbolat Tileýhan, Aıtqaly Jaıymov, Aıtjan Toqtaǵan aǵalarymyz óner kórsetedi. Munymen qosa, kórermen qaýym Qurmanǵazy atyndaǵy Qazaq memlekettik ulttyq aspaptar orkestri, «Otyrar Sazy» ulttyq aspaptardyń folklorlyq-etnografııalyq orkestri, Astana qalasynyń Memlekettik akademııalyq fılarmonııasynyń ulttyq aspaptar orkestri, Táttimbet atyndaǵy akademııalyq ulttyq aspaptar orkestri jáne Aqtaý qalasynyń Qazaq ulttyq aspaptar orkestriniń ónerin tamashalaıdy dep kútilýde.
Aıta keteıik, Ulttyq dombyra kúniniń qurmetine ótetin serýende nıet bildirgenderdiń barlyǵy sahnaǵa shyǵyp, dombyrada oınaý ónerin kórsete alady. Negizgi talap: dombyrashylar «Kóńil ashar», «Adaı», «Balbyraýyn», «Erke Sylqym», «Saryarqa» kúılerin jatqa bilýi qajet. Búginge deıin merekelik keshke qatysýǵa www.asyldombyra.kz saıty arqyly nıet bildirgenderdiń sany 1300 adamnan asady.
Esterińizge sala keteıik, qoǵamdy ulttyq mádenıet pen biregeılikti saqtaý men qaıta jańǵyrtý ıdeıasynyń tóńireginde odan ári toptastyrý maqsatynda 14 maýsymda Memleket basshysy Nursultan Nazarbaev shildeniń birinshi jeksenbisin Ulttyq dombyra kúni etip belgileý týraly Jarlyqqa qol qoıǵan bolatyn.
