Astanalyqtar Afrıka kúnin atap ótýde
ASTANA. 25 mamyr. QazAqparat - Búgin, 25 mamyr - Afrıkanyń azattyq kúni.
1963 jyly Efıopııa astanasy Addıs-Abebada Afrıka elderi basshylarynyń І konferentsııasy ótip, onyń nátıjesi boıynsha Afrıka elderiniń Birligi uıymy quryldy. Sol jyldyń 25 mamyrynda qazirgi Afrıka Odaǵy quryldy.
Ár jyl saıyn afrıkandyqtar bul kúndi Afrıka kedeılik pen aýrýlardan, áskerı janjaldardan, kúrdeli ekonomıkalyq jaǵdaıdan shyǵady degen úlken senimmen atap ótedi. BUU-nyń sheshimimen bul kún - Afrıkanyń azattyq kúni dep jarııalandy.
Osy merekege oraı, Qazaqstandaǵy Mysyr, Lıvııa jáne Ońtústik Afrıka Respýblıkalarynyń elshilikteri Astanada Afrıka aptasyn atap ótýdi usyndy.
24 mamyrdan bastap elordadaǵy «Redısson» qonaqúıinde afrıkandyq aspazshylardyń festıvali ótýde. Kelýshiler sharaptardan dám tatyp, sándik-qoldanbaly óner kórmesin, qyzý qandy afrıkandyqtardyń bılerin tamashalaýda. Sondaı-aq kórkem fılmderdi kórip, barabandarda oınaý kýrstaryna qatysýda.
Astanada alǵash ret keńinen atap ótilip otyrǵan bul mereke 29 mamyrǵa deıin jalǵasady.
