Astanalyqtar «109»-ǵa kez kelgen shaǵymmen habarlasa alady - Isekeshev
ASTANA. QazAqparat - Astana ákimi Áset Isekeshev azamattardyń ótinishi men shaǵymdaryn óńdeýge qatysty júıeniń jetildirilgenin málim etti, dep habarlaıdy QazAqparat tilshisi.
Qala ákiminiń Facebook-tegi óz paraqshasynda 109 qyzmeti bazasynda qurylǵan «iKomek» qalalyq monıtorıng jáne jedel áreket etý ortalyǵyn tanystyrdy. Atalǵan qyzmet baılanystyń barlyq túrin qamtyǵan. Atap aıtqanda, 109 statsıonarlyq telefondary, Facebook-tegi toptar men Telegram-daǵy chat-bottar, sondaı-aq áleýmettik jelilerge, elektrondyq poshtaǵa, Smart Astana (Android pen iOS-qa negizdelgen) mobıldik qosymshasyna monıtorıng júrgizý.
Shahar basshysynyń aıtýynsha, atalǵan qyzmettiń arqasynda qandaı da bir másele boıynsha qaıda jáne qalaı shaǵymdanýǵa bolatynyn túsiný úshin ákimdikke baryp, basqarmalar men kommýnaldyq kásiporyndardyń qurylymyna enýdiń, telefon nomirlerin izdeýdiń qajeti bolmaıdy.
«Meıli ol shatyrdan aqqan sý, isten shyqqan lıft, túngi ýaqyttaǵy shý nemese sýdyń, jylýdyń, elektrenergııasynyń bolmaýy, ashyq qalǵan qudyq,tazalanbaǵan qar ne bolmasa qańǵybas janýarlarǵa qatysty shaǵym bolsyn, kez kelgen ótinish tirkeledi jáne ol jaýapty basqarmaǵa jiberilip, baqylaýǵa alynady. Jalpy, shtattan tys jaǵdaılardyń 164 túrine jedel áreket etýdiń algorıtmi jasalynǵan. Máselelerdiń keıbirin sol mezette nemese jarty saǵat ishinde sheshýge bolsa, asa qıyn apattardyń aldyn alý birneshe saǵatty qajet etýi múmkin», - dedi Áset Isekeshev.
Ákimdiktiń derekterine sáıkes, «iKomek» qyzmetine byltyr turǵyndardan 400 myńnan asa ótinish túsken. Al aǵymdaǵy jyldyń basynan beri olardyń sany 200 myńnan asqan. Óz kezeginde, qalalyq qyzmet kórsetý ortalyqtaryna keletin azamattardyń sany 5 esege azaıǵan. Eger buǵan deıin kúnine 5 myńǵa jýyq adam keletin bolsa, qazirgi tańda olardyń sany myńǵa jaqyn.
