Astanalyq jurt máýlit merekesin atap ótti
ASTANA. 8 aqpan. QazAqparat - Astanada máýlit merekesine oraılastyrylǵan keshte elordalyq jamaǵat Allany ulyqtap, Muhammed paıǵambarǵa salaýat aıtty.
Kongress holl saraıynda ótken shara barysynda súıikti Paıǵambarymyzdyń (s.ǵ.s) ómirbaıany jáne ósıetteri jaıynda nasıhattar aıtyldy. Paıǵambarǵa (s.ǵ.s.) arnalyp arabsha salaýat oqyldy. Taqyrypqa saı ıláhı ánder shyrqalyp, taǵylymdy beıne materıaldar kórsetildi.
«Muhammed paıǵambarymyzdyń (s.ǵ.s) dúnıege kelgen aıyn ısi musylman máýlit aıy dep atap, paıǵambarymyz jaıynda, onyń aıtqan ósıetterin, ǵıbratqa toly ǵumyryn óskeleń urpaqqa nasıhattap, Muhammedke salaýat aıtý, onyń úmmetti bolǵanyna maqtanysh tutyp, osyndaı dinı keshterdi ótkizedi. Sebebi Muhammed paıǵambarymyz (s.ǵ.s) bir hadısinde: «Kimde kim meniń esimimdi estıtin bolsa, maǵan salaýat aıtsyn, sálem joldasyn. Kim maǵan bir salaýat aıtatyn bolsa, Alla Taǵala oǵan on salaýat aıtady, on kúnásin keshiredi, onyń dárejesin kóteredi», - deıdi. Sondyqtan ısi musylman qaýym osy aıda kóbirek salaýat aıtyp, sálem joldaıdy», - dep atap kórsetti Qazaqstannyń musylmandar dinı basqarmasy dinı oqý-aǵartý bóliminiń meńgerýshisi Seıitbek Smaıyl «QazAqparat» tilshisine bergen suhbatynda.
«Balalarymyzǵa onyń máni men mańyzyn túsindireıik. Máýlit sharapatymen kóńilderimizdi tazalap, Allaǵa jáne Paıǵambarymyzǵa (s.ǵ.s.) degen mahabbatymyzdy arttyraıyq. Sebebi, Paıǵambarymyz (s.ǵ.s.) hadıs-sharıfinde: "Senderdiń eshqaısylaryń meni ata-anasynan, bala-shaǵasynan jáne barlyq adamzattan artyq jaqsy kórmeıinshe, shyn ıman keltire almaısyńdar", - degen», - deıdi S.Smaıyl.
