Astanalyq jýrnalıster áskerı daıyndyqtan ótti

ASTANA. QazAqparat - Şýche qalasyndaǵy QR QM Armııa ortalyq sport klýbynda QR Qorǵanys mınıstrligi astanalyq jýrnalıster men blogerlerge arnalǵan baspasóz týryn ótkizdi. Áskerı ómirdiń qyzyq ta kúrdeli tirshiligimen tanysqan BAQ ókilderi arasynda «QazAqparat» HAA tilshisi de bar.

  

Úsh topqa bólingen jýrnalıster men blogerler arasynda áskerılendirilgen oıyn túrindegi jarys ótti. Jarys baǵdarlamasynda fızıkalyq qabilettermen qatar, ańǵarympazdyq pen tapqyrlyqty jáne zerektikti qajet etetin logıkalyq tapsyrmalar boldy.

  

Baspasóz týrynyń negizgi maqsaty - belsendi jáne salaýatty ómir salty men áskerı-qoldanbaly sport túrlerin nasıhattaý edi. Sharaǵa qatysqan tilshiler arasynda alǵash ret atqa minip, alǵash ret shańǵy teýip kórgender bar.

   

Odan bólek, tilshiler peıntbol men pnevmatıkalyq vıntovkadan oq atýda óz sheberlikterin tanytyp, joǵary nátıje kórsetti. Qarsylasty jeńý úshin jýrnalıster arnaıy strategııa quryp, ym-ısharamen jumys isteýdi úırendi.

  

Saıys barysynda kompaspen jol tabýda, kedergilerden ótýde komandanyń bir-birine ózara kómektesýi qosymsha upaı beretin. Bul jýrnalıster arasyndaǵy ózara qurmet pen dostyqty, uıymshyldyqty nyǵaıta tústi.  

  

Oıyn sońynda jeńimpazdar arnaıy dıplomdarmen jáne medaldarmen marapattaldy. Olardyń júzinen Otan qorǵaýshylarǵa degen qurmettiń eselep artqanyn ańǵarý qıyn emes edi.