Astanalyq JITS ortalyǵynda psıho-áleýmettik keńes berýdiń ozyq tásilderi talqylandy
ASTANA. QazAqparat - Astana qalasynyń JITS ortalyǵynda «AITV juqpasyna tekserilý kezinde testke deıingi jáne odan keıingi keńes berýdiń negizgi qaǵıdattary» taqyrybynda alǵashqy medıtsınalyq-sanıtarlyq kómek kórsetetin jáne statsıonarlyq mekemelerdiń qyzmetkerlerine arnalǵan semınar-trenıng ótti.
AITV juqpasynyń aǵymdaǵy epıdemıologııalyq jaǵdaıynda medıtsınalyq úıymnyń túrine baılanysty psıho-áleýmettik keńes berýdiń ozyq, tıimdi ári qolaıly tásilderiniń qajettigi týyndady.
Mamandar AITV juqpasyna testileý jáne keńes berý, sondaı-aq stıgma men kemsitýshilik taqyrybynda mańyzdy suraqtardy kóterdi. Semınar barysynda Astana qalasynda 2016 jyldyń 8 aıynda AITV-ınfektsııasynyń 133 jaǵdaıy tirkelgeni, onyń 30% astamy basqa qaladan kelgenderge, 69% jumys isteıtin azamattarǵa tıesili ekendigi ataldy.
Materıaldardy jaqsy meńgerý úshin trenıng róldik oıyndarmen súıemeldendi.
Sondaı aq, JITS ortalyǵynyń dárigerleri «90-90-90» jańa strategııasyn júzege asyrý maqsatynda turǵyndardyń tekserilý aýqymyn keńeıtý qajettiligin eske saldy: turǵyndardyń 90% óziniń AITV mártebesin bilýi tıis, 2020 jylǵa qaraı AITV-ınfektsııasy bar naýqastar tolyǵymen em alatyn bolady, em alatyn adamdardyń 90% vırýs júktemesi barynsha tómendetiledi. Bul óz kezeginde epıdemııanyń toqtaýyna, stıgma men kemsitýshiliktiń azaıýyna jáne áleýmettik shekteýge tosqaýyl bolady.
Semınar sońynda bas dárigerdiń orynbasary Saltanat Mýsına qatysýshylarǵa mindetti áleýmettik medıtsınalyq saqtandyrýdy engizý jáne bul júıe iske asqannan keıin JITS ortalyǵynda medıtsınalyq kómek alý tártibi týraly aıtyp berdi.
