Astanalyq jigit súıiktisinen qaryzǵa 1 mln teńge alyp bermeı ketken
ASTANA. QazAqparat - Astanalyq jigit kóńil qosqan qyzynan 1 mln teńge alyp, bermeı ketken. Bul týraly qalalyq sottyń baspasóz qyzmeti habarlaıdy.
«2017 jyldyń 24 qańtarynda S. esimdi azamat M. esimdi boıjetkennen 1 mln teńge aqshany qolhat arqyly alǵan, qaryzyn eki aıdan soń qaıtarýǵa sóz bergen. Sot barysynda anyqtalǵandaı, boıjetken aqshany astanalyq bankterdiń birinen kredıtke alǵan. Bir jyl ótse de onyń qaryzy qaıtpaǵan. Astana qalasynyń esil aýdandyq sotynyń sheshimimen japa shegýshige qaryzǵa bergen aqshasy qaıtaryldy», - delingen habarlamada.
Sheshim zańdy kúshine endi.
