Astanalyq «Jastar teatrynyń» Almatydaǵy gastroldik sapary aıaqtaldy
ALMATY. 4 jeltoqsan. QazAqparat - Astana qalasynyń "Jastar teatry" keshe Almatydaǵy Muhtar Áýezov atyndaǵy Qazaq memlekettik akademııalyq drama teatryndaǵy eki kúndik gastroldik saparyn aıaqtady.
Ol 2011 jyly 26-30 qyrkúıek aralyǵynda Qazaqstan Táýelsizdiginiń 20 jyldyǵyna oraı Ǵabıt Músirepov atyndaǵy akademııalyq balalar men jasóspirimder teatrynda uıymdastyrylǵan XIX respýblıkalyq teatr festıvalinde bas júldeni jeńip alǵan «Mekkege qaraı uzaq jol» qoıylymymen aıaqtaldy. Qyrǵyz dramatýrgi Sultan Raevtyń bul qoıylymyn qazaqshaǵa aýdaryp, sahnalaǵan rejısser QR Eńbek sińirgen qaıratkeri Nurqanat Jaqypbaev.
"2007 jyly qurylyp, shymyldyǵyn 5 shildede Sh.Aıtmatovtyń «Shyńǵyshan» spektaklimen ashqan bul teatrdyń repertýarynda qazirgi tańda 20 spektakl bar. Endi 18 jeltoqsanda olardyń qatary "Asaýǵa tusaýmen" tolyqpaq. Bul týyndynyń da rejısseri Nurqanat Jaqypbaev, sýretshisi Erlan Tuıaqov. Jastar teatry bolǵan soń klassıkalyq qoıylymdardy jańasha sahnalaýǵa kóp mán beremiz", - deıdi teatrdyń alǵashqy dırektory, Jastar syılyǵynyń laýreaty, akter Ǵanı Quljanov. Onyń aıtýynsha, jurtshylyqqa birshama tanymal bolyp qalǵan óner ujymynyń bul Muhtar Áýezov atyndaǵy Qazaq memlekettik akademııalyq drama teatryndaǵy ekinshi gastroldik sapary bolyp otyr. Alty jyldyń ishinde túrli festıvalderde 5 birdeı bas júldeni oljalaǵan. Atap aıtqanda,2008 jyldyń qazan aıynda Qyrǵyzstannyń Bishkek qalasynda ótken Halyqaralyq «ART ORDO» teatr festıvalinde Sh.Aıtmatovtyń «Jan azaby» spektaklimen «Eń úzdik spektakl» dep tanylyp, alǵashqy bas júldeni jeńip alǵan. Al 2009 jyldyń sáýir-mamyr aılarynda 55 kún Almaty oblysynyń 12 aýdany 36 eldi mekeninde bolyp, óz ónerimen sońǵy 10 jyldyqta Qazaqstan teatr ómirinde bolmaǵan gastroldik rekordty jańartty. 2010 jyly Qaraǵandy qalasynda ótken Respýblıkalyq teatrlar festıvalinde Halyq ártisi «Jamıla Shashkına» atyndaǵy syılyqtyń ıegeri atandy. Almaty qalasynda ótken ІІІ Halyqaralyq Ortalyq Azııa elderiniń teatrlar festıvaline qatysyp, «Úzdik rejısser» jáne «Úzdik Shyńǵyshan róli» ataǵyna ıe boldy. 2012 jyldyń 9-13 sáýir aralyǵynda Túrkimenstannyń Ashhabad qalasyna ótken "Jańǵyrý dáýiri jáne teatr óneri" halyqaralyq teatrlar festıvalinen júldeli oralǵan edi. Bıyl 11-24 sáýirde Túrkııada gastrolmen bolyp, Konııa memlekettik teatry uıymdastyrǵan 6-shy halyqaralyq «Myń tynys bir daýys» festıvalinde D. Salamattyń «Ǵaıyptaǵy máńgilik mahabbat sazy» qoıylymymen uıymdastyrýshylardyń arnaıy marapatyna ıe boldy.
