Astanalyq jastar Ǵashyqtar kúnin atap ótti

Keshe keshqurym, elordanyń joǵary oqý oryndarynda bilim alatyn 2 myńǵa jýyq jas S.Seıfýllın atyndaǵy Qazaq agrotehnıkalyq ýnıversıtetiniń ǵımaraty aldyndaǵy alańǵa jınalyp, sońǵy jyldary dástúrge aınala bastaǵan «Qozy Kórpesh pen Baıan sulý» kúnin atap ótti. Merekeni uıymdastyrýshy - S.Seıfýllın atyndaǵy QazATÝ.

Ýnıversıtettiń baspasóz ortalyǵynyń dırektory Talǵat Mahanovtyń aıtýynsha, is-sharany uıymdastyrýǵa rektor Aqylbek Kúrishbaevtyń Naýryz meıramy kezinde aıtylǵan: «Bizdiń ulttyq oıyndarymyzdyń tálim-tárbıelik, fılosofııalyq, taǵylymdyq astary tereń», -degen sózderi túrtki bolǵan.
Oqý ornynyń ákimshiligi ulttyq oıyndarymyzdyń astarly mán-maǵynasyn jastarǵa túsindirý jáne sezindirý maqsatynda, elordada alǵashqylardyń biri bolyp kópshilikpen «Aqsúıekti» oınaýdy qolǵa aldy.

Ýnıversıtet aldyna eki kıiz úı qurylyp, altybaqan ornatyldy. Qas qaraıǵansha jınalǵan qaýym merekelik baǵdarlamany tamashalady. Kúmbirlegen kúıler men ásem ánder molynan shyrqalyp, Aqan seriniń ómiri týraly teatrlandyrylǵan kórinis qoıyldy. Stýdenttik shaqtarynda atalmysh ýnıversıtette tanysyp, shańyraq kótergen, keshegi - stýdentter, búgingi - ustazdar, erli-zaıypty juptar óz ómir joldarynan syr shertip, jastarǵa ónegeli áńgimelerin aıtty.

Jalyndaǵan jastardy merekelerimen rektor Aqylbek Kúrishbaev arnaıy kelip quttyqtady.

Kesh batqan soń, bir-birine ǵashyq jastardyń 35 juby ýnıversıtet aldyndaǵy saıabaqta «Aqsúıek» oınaýǵa kiristi.

Merekelik keshti túsirgen beınekameralardyń jazbalary árbir 15 mınýt saıyn oqý ornynyń www.agun.kz saıtyna ornalastyrylyp otyrdy. Sondyqtan, dýmanǵa qatysa almaǵandar ony úılerinde otyryp kórý múmkindigin aldy.

Mereke sońy jastardyń bı keshine ulasty.