Astanalyq jas túlekti álemniń 7 ýnıversıteti oqýǵa shaqyrdy
ASTANA. QazAqparat - Astanadaǵy daryndy balalarǵa arnalǵan №9 «Zerde» mektebiniń túlegi Nurálı Sarbaqysh jeti birdeı álemdik ýnıversıtetke oqýǵa túsip, rekord ornatty, dep habarlaıdy QazAqparat Elorda ınfoǵa silteme jasap.
«Mektepti 5-ke aıaqtap jatyrmyn, Altyn belgini aqtaýǵa tyrysamyn. Meni 7 birdeı joǵary oqý orny qabyldady. Onyń ishinde bireýi qazaqstandyq ýnıversıtet. Atap aıtsam, oqý oryndarynyń biri - Kıprdegi Lefke eýropalyq ýnıversıtet, ekinshisi Germanııa men Bremendegi Jacobs ýnıversıteti, taǵy úsh oqý orny Qytaıda: Beıjiń, Shanhaı jáne Hýfeı», - deıdi Nurálı.
Sondaı-aq, elordalyq oqýshy Nazarbaev ýnıversıtetiniń Foundation baǵdarlamasy boıynsha oqýǵa qabyldanǵan. Sondaı-aq, birden bakalavrıatqa túsýge ótinish bildirgen. Bakalavrıattyń jaýaby tek birneshe aıdan keıin daıyn bolady. Bul ekeýiniń aıyrmashylyǵy sol, Foundation baǵdarlamasyna aǵylshyn tili men jalpy pánderdi oqý kýrsy kiredi. Sáıkesinshe, ol kezde oqý uzaqtyǵy bakalavrıatqa qaraǵanda bir jylǵa artyq bolady.
«Jalpy daıyndyqty 9-10 synypta bastaý kerek. Aǵylshyn tiline kóbirek kóńil bólip, sheteldik emtıhandardy tapsyrý kerek. Soǵan kóp ýaqyt jumsaý kerek. Sebebi talapkerdiń akademııalyq tarıhy minsiz bolýy shart. Sondaı-aq, sen óziń jaıly esse jaza bilýiń kerek. Emtıhan nátıjesi aıtarlyqtaı keremet bolmasa da, maqsaty aıqyn jigit ekenińdi dáleldeı alsań, ony qaǵazǵa túsire alsań, qabyldaý komıssııasynda otyrǵan adam seniń aqyldy jigit ekenińdi túsinedi», - deıdi oqýshy.
Nurálı bolashaqta kompıýterlik tehnologııa salasynda ınjener bolýdy josparlap otyr.
Nurálı oqý jylynyń basynda halyqaralyq SAT jáne IELTS emtıhandaryn tapsyrǵan. Nurálı áli oqý ornyna tańdaý jasamaǵan. Alaıda ol qazaqstandyq ýnıversıtetti de tańdaýy múmkin ekenin jasyrmaıdy.
«Áli naqty sheshim qabyldaǵan joqpyn. Biraq Germanııa men Katardy tańdaǵym keledi. Meniń mamandyǵym boıynsha alda kele jatqan elder osy sııaqty. Biraq Qytaıda da óte jaqsy. Áli tańdamadym. Qazaqstandyq ýnıversıtetti de qarastyryp jatyrmyn. Onyń jaýaby jaqynda ǵana kelgendikten, áli oılanbadym. Sondaı-aq, men Súleıman Demırel ýnıversıtetiniń olımpıadasynda 4-oryn aldym. Onda maǵan grantqa 50% kepildik bar. Kimep-te ekinshi oryn aldym, ol jaqta da 50% grant. Biraq men bas tarttym», - dep atap ótti ol.
