Astanalyq jas sýretshiler jerasty jaıaý júrginshiler ótpesinde kórme uıymdastyrdy
ASTANA. 26 sáýir. QazAqparat - Astana qalasynyń jas sýretshileri Kongress-hollǵa qarsy ornalasqan jerasty jaıaý júrginshiler ótpesinde kórme uıymdastyrdy, dep habarlady "Habar" agenttigi.
Osylaısha olar búgingi jastardyń basynda bar nashaqorlyq, ishimdik, túsik jasatý sııaqty eń ózekti problemalarǵa qoǵam nazaryn aýdyrǵysy kelgen.
Kórmege 25 týyndy qoıylypty. Taqyryptary da áralýan. Jastar mádenıetiniń tómendigin de sýretteı bilgen jas qylqalam sheberleriniń shyǵarmalary - búgingi kúnniń kóptegen kúrdeli taqyryptaryn qamtyǵan. Sýıtsıd, din jolynan adasqandar men ishimdikqumar jastardyń jáne temekige áýes bolashaq ana, búgingi boıjetkenderdiń beınesi keskindelgen kartınalar jerasty jolynan ótip jatqan jurtshylyqtyń nazarynda boldy. Kóp kórermenniń arasynan Májilis depýtaty Murat Ábenov te tabyldy. Májilismenge jas sýretshi Gúlmaral Tátibaevanyń memlekettik baǵdarlama aıasynda salynyp jatqan qurylystardy keskindegen eńbegi unaǵan.
«Maǵan qatty áser etkeni, bul - jastardyń ózderi kózben kórip júrgen problemalar. Mysaly, Astanada salynyp jatqan úılerdi kórsetken. Jeke qarjymen salynyp jatqan úıler tez, ári sapaly bitedi de, al bıýdjet arqyly jastarǵa dep salynyp jatqan úılerdiń bitip bolmaýy, bitse de sapasynyń nashar bolyp jatatyny sııaqty», - deıdi Murat Ábenov.
