Astanalyq jas shahmatshy Álem chempıonatynda altyn aldy (FOTO)
ASTANA. QazAqparat - Toǵyz jasar Ámına Qaıyrbekova 9 jasqa deıingi mektep oqýshylary arasynda Taılandtyń Pattaııa qalasynda ótken Álem chempıonatynda birinshi oryn aldy,dep habarlady astana.gov.kz.
Elimizdiń jas shahmatshylary jalpy komandalyq esepte 10 medal ıelenip, nátıjesinde tórtinshi orynǵa turaqtady. Chempıonat qorytyndysyna súıensek, el quramasynyń qorjynynda bes qola, úsh kúmis jáne eki altyn medal bar.
Qola júldeni Samal Ábdýálı (13 jasqa deıin), Arystanbek Orazaev (17 jasqa deıin), Altynaı Qojamqul (7 jasqa deıin), Qazybek Nógerbek (11 jasqa deıin) jáne Nazerke Nurǵalı (11 jasqa deıin) ıemdendi. Kúmis medal Ámına Qaırbekovaǵa, Ańsat Aldııarǵa (7 jasqa deıin), Denıza Qurmanalınaǵa (7 jasqa deıin) buıyrdy. Al altyn medaldy Saıyn Janat (17 jasqa deıin) pen Ámına Qaırbekova enshiledi.
Elimizge oralǵan jeńimpaz jas sportshylardy áýejaıda týystary men ata-analary ystyq yqylaspen qarsy aldy.
- Men úshin chempıonatta eń myqty qarsylastar Mońǵolııadan, Qytaı men Úndistannan kelgen shahmatshylar boldy. Biraq, soǵan qaramastan, barymdy salyp birinshi oryndy ıelendim. Jarysqa bara jatqanda nıetim elge birinshi orynmen oralý boldy, - deıdi Ámına.
Ámınanyń anasynyń aıtýynsha, bala 5 jasynan shahmat oınaıdy eken. Ol mektepte úzdik oqýshy. Odan ózge kásibı baletpen de aınalysqan. Biraq, ýaqyttyń tyǵyzdyǵynan ol ónerdi tastaýǵa týra keldi.
Ámına shahmat birinshiliginde jalpy 9 balldyń 8 enshilep, týrnır jeńimpazy atandy. Keıin altyn medalǵa taǵy bir kúmis medal da qosyldy. Osylaısha, jas shahmatshy blıtste ekinshi boldy.
